Komuna e Prishtinës ka marrë një vendim me rëndësi të veçantë për trajtimin dinjitoz të familjeve të dëshmorëve të Kosovës. Kryetari i komunës, Përparim Rama, ka firmosur sot vendimin që i garanton këtyre familjeve shfrytëzimin e banesave komunale për një periudhë prej 99 vjetësh.
Vendimi përfshin familjet e heronjve të njohur të kombit, si ajo e Adem Jasharit, Zahir Pajazitit, Agim Ramadanit dhe të tjerëve, të cilët kanë dhënë gjithçka për lirinë e vendit. Kjo masë vjen si vazhdim i një praktike të mëparshme, kur banesat ishin ndarë për periudha të shkurtra, por tashmë krijon një bazë të qëndrueshme dhe afatgjatë për strehimin e tyre.
Postimi i plote:
Prishtina u detyrohet familjeve të Adem Jasharit, Zahir Pajazitit, Agim Ramadani dhe dëshmorëve të tjerë, jo vetëm me nderim moral, por edhe trajtim dinjitoz dhe të qëndrueshëm.
Sot, si Kryetar i Prishtinës, kam nënshkruar vendimin që banesat komunale të ndara për familjet e dëshmorëve të Republikës, të jepen për shfrytëzim për 99 vjet.
Kjo është një vazhdimësi e një vendimi të nisur vite më parë e miratuar në Kuvendin Komunal të Prishtinës, kur këto banesa banimi janë ndarë për periudha të shkurtra kohore. Ne kemi vlerësuar se është koha që këto familje të kenë jo vetëm strehë, por siguri të plotë e AFATGJATË.
Ky nuk është akt favori, por një hap institucional drejt drejtësisë dhe kujtesës kolektive.
Mirënjohje e thellë për familjet që kanë dhënë më të shtrenjtën për lirinë që sot e jetojmë të gjithë.
