Shqiptarët janë faktorë me rëndësi në tregun global të drogës, nga Kanadaja në Emiratet Arabe, thotë raporti i SHBA-së, për Strategjinë e Kontrollit Ndërkombëtar të Narkotikëve.
Korrupsioni, sundimi i dobët i ligjit dhe papunësia nxisin problemin e trafikimit të drogës në Shqipëri, thekson DASH, teksa vlerëson punën e SPAK në parandalimin e korrupsionit.
“SPAK rriti numrin dhe kompleksitetin e hetimeve për pastrimin e parave dhe konfiskimet dhe kreu paralelisht hetime financiare dhe të aseteve kur dyshonte për asete të paligjshme; megjithatë, ndjekjet penale mbeten të ulëta. Në vitin 2023, SPAK sekuestroi asete me vlerë 43 milionë dollarë dhe, në vitin 2024, vazhdoi arrestimet dhe konfiskimin e aseteve të ish-zyrtarëve të lartë”, përmend raporti.
Në dokument thuhet se Shqipëria ka ende rrugë për të bërë në luftën kundër pastrimit të parave dhe se është target i organizatave kriminale nga Amerika e Jugut dhe Europa, për pastrimin e parave.
Qeveria dhe institucionet duhet të zbatojnë plotësisht reformat për të shmangur rënien përsëri të sundimit të ligjit, propozon DASH, duke shtuar se SPAK duhet të integrohet tërësisht në luftën e qeverisë kundër pastrimit të paravae.
“Shumica e pastrimit të parave në Shqipëri lidhet me trafikimin e drogës dhe njerëzve, mashtrimin me kontratat qeveritare, evazionin fiskal dhe kontrabandën. Ekonomia kryesisht e bazuar në para të thata, kontrollet e dobëta kufitare dhe ligjzbatim i dobët doganor lehtësojnë një treg të zi për mallrat e kontrabanduara. Paratë e dërguara nga jashtë (remitancat) dhe investimet nga jashtë ndonjëherë fshehin burimet e fondeve. Kriminelët pastrojnë të ardhurat përmes blerjeve të pasurive të paluajtshme, projekteve të ndërtimit, aseteve virtuale dhe zhvillimit të bizneseve”, thuhet në raport.
