Gazeta amerikane Politico, duke cituar katër diplomatë të NATO-s, tha se SHBA-ja po kërkon nga aleanca të reduktojë aktivitetin e saj të jashtëm, përfshirë atë në misionin paqeruajtës në Kosovë – KFOR.
Megjithatë, një zyrtar i NATO-s i tha Insajderit se aktualisht nuk ka ndryshime. Ai shpjegoi se pozicioni i misionit KFOR rishikohet dhe përshtatet periodikisht sipas zhvillimeve.
“Forca dhe pozicionimi i KFOR-it rishikohen dhe përshtaten periodikisht, në përputhje me zhvillimin e rrethanave, në mënyrë që misioni të mbetet i përshtatshëm për qëllimin e tij. Aktualisht, nuk ka ndryshime të rëndësishme në shqyrtim”, tha ai.
Ai shtoi se stabiliteti në rajon varet nga zgjedhja e diplomacisë mbi dhunën, dhe rruga drejt paqes afatgjatë është politike.
“Prania dhe aktivitetet e përditshme të KFOR-it në të gjithë Kosovën krijojnë hapësirë për dialog politik. Stabiliteti në rajon në fund të fundit varet nga zgjedhja e diplomacisë mbi dhunën nga të gjitha palët. Rruga drejt paqes afatgjatë është politike. NATO vazhdon ta mbështesë fuqishëm Dialogun e lehtësuar nga BE-ja si kornizën për zgjidhjen e çështjeve të mbetura, me respekt për të drejtat e të gjitha komuniteteve”.
Zyrtari i NATO-s theksoi se SHBA-ja ka pothuajse 600 trupa të dislokuara në kuadër të KFOR-it.
“Shtetet e Bashkuara vazhdojnë të luajnë një rol themelor në mbështetjen e sigurisë së qëndrueshme në të gjithë Kosovën dhe stabilitetit rajonal, përfshirë në kuadër të misionit të udhëhequr nga NATO, KFOR. Shtetet e Bashkuara kanë pothuajse 600 trupa të dislokuara në kuadër të KFOR-it. Ato udhëheqin Komandën Rajonale Lindje (RC-East) të misionit. RC-East kontribuon në aktivitetet e përditshme të KFOR-it në mënyra të ndryshme, përfshirë përmes patrullimeve, ushtrimeve, angazhimeve me përfaqësues të të gjitha komuniteteve lokale, si dhe mbështetjes për projekte rindërtimi dhe zhvillimi ekonomik”.
Edhe Pentagoni ka deklaruar se nuk ka ndonjë ndryshim në strukturën ushtarake.
“Nuk kemi ndryshime në stacionimin e forcës sonë për të njoftuar sot”, ka thënë një zëdhënës i Pentagonit për Gazetën Express.
Siç ka raportuar sot “Politico” SHBA-ja nën presidentin Donald Trump po e shtyn NATO-n të shkurtojë shumë nga aktivitetet e saj të jashtme, duke përfshirë edhe përfundimin e një misioni kyç të aleancës në Irak.
Sipas kësaj gazete, SHBA-ja gjithashtu ka lobuar në muajt e fundit për të zvogëluar operacionin paqeruajtës të NATO-s në Kosovë.
