Veriu.info në muajin maj ka raportuar ekskluzivisht se si Agjencia e Ushqimit dhe Veterinarisë, institucion që funksionon në kuadër të Ministrisë së Bujqësisë, Pylltarisë dhe Zhvillit Rural, më ministër në detyrë, Faton Peci, ka zbuluar mbi 31 tonë mish peshku të infektuar më krimba, por që për më shumë se 1 vit e kishte mbajtur të fshehur skandalin.
Edhe pse mish i peshkut i infektuar me krimba “Anisakis” ishte zbuluar në shkurt 2024, asgjësimi i tij është bërë tek sot, që i bie mbi 1 vit e gjysmë më vonë.
“Agjencia e Ushqimit dhe Veterinarisë (AUV), në bashkëpunim me kompaninë përkatëse, ka filluar sot procesin e asgjësimit të 35,170 kilogramëve peshk. Ky veprim kryhet me qëllim garantimin e sigurisë shëndetësore të konsumatorëve dhe respektimin e standardeve ndërkombëtare të cilësisë. Asgjësimi po realizohet në bazë të vendimit të Gjykatës Komerciale në Prishtinë – Dhoma e Shkallës së Dytë, sipas Aktvendimit Nr. të lëndës 2025:134825 me nr. dokumenti 07679680”, tuhet në njoftimin e bërë sot (3 tetor 2025) nga AUV.
Veriu.info ka siguruar aktvendimin e Gjykatës Komerciale të datës 27.02.2025 me të cilën hedhet poshtë propozim-kërkesa e përsëritur e “DELFIN L.T.D.” për shtyerjen e ekzekutimit të vendimeve të nxjerra nga AUV 29.02.2024 dhe me 08.03.2024 me të cilat urdhërohej kompania që mishin e peshkut të infektuar me krimba ta kthej në vendin e origjinës ose ta asgjësoj brenda 60 ditësh.
Po ashtu, Veriu.info ka siguruar vendimin e Shkallës së Dytë të Gjykatës Komerciale me të cilin refuzohet si e pabazuar ankesa e “DELFIN L.T.D.” ndaj vendimit të Shkallës së Parë të kësaj gjykate, me ç’rast vërtetohet aktvendimi i Shkallës së Parë.
Edhe pse në muajin prill 2025 gjykata në shkallë të dytë kishte nxjerrë aktvendimin për refuzimin e ankesës së “DELFIN L.T.D.”, AUV ka pritur deri sot (3 tetor 2025) për asgjësimin e mishit të peshkut Hake (Merluc Hubbsi) të infektuar me krimva në sasi prej 35,170 kilogram.
Më poshtë gjeni vendimet e AUV dhe Vendimi e dy shkallëve të Gjykatës Komerciale:
