Gjermania planifikon që të blejë 15 aeroplanë luftarakë F-35, raportoi të premten mediumi “Politico” duke cituar disa persona të afërt me këtë çështje. Kjo blerje do ta çonte në 50 numrin e përgjithshëm të aeroplanëve të tillë në flotën e Gjermanisë.
Raporti për blerjen e re vjen në kohën e tensioneve mes Gjermanisë dhe Francës në lidhje me projektin e përbashkët franko-gjerman për aeroplanë luftarakë, FCAS, pas një raporti që doli më herët këtë javë se Franca tani dëshiron një përqindje të punës prej 80%, raporton agjencia e lajmeve “Reuters”.
Ministria e Mbrojtjes e Gjermanisë nuk iu përgjigj menjëherë një kërkese për koment nga agjencia “Reuters”.
Deri më tani, Gjermania ka porositur 35 aeroplanë luftarakë të tipit F-35 për të zëvendësuar gjithsej 85 aeroplanë të tipit “Tornado” që po vjetrohen dhe që do të nxirren nga përdorimi.
Një burim ushtarak i tha agjencisë “Reuters” se numri prej 15 aeroplanëve shtesë të tipit F-35 ka qenë pjesë e shqyrtimeve të kaluara, por se shifra e nevojshme duhet të përshtatet, pasi NATO-ja rishtazi u pajtua për caqe të reja për numra të armëve dhe ushtarëve.
Pas vendosjes së caqeve të reja, kishte pak gjasa që numri fillestar të ishte realist. Kjo lë të kuptohet se numri i vërtetë i aeroplanëve shtesë të tipit F-35 mund të jetë më i lartë në fund, edhe pse burimi nuk konfirmoi një gjë të tillë.
Kancelari gjerman, Friedrich Merz, tha të mërkurën se mbeten dallime sa i përket konfigurimit të projektit, i cili është dëmtuar nga vonesat dhe lufta e brendshme për përqindjen e punëve dhe të drejtat e pronësisë intelektuale.
Nëse Franca nuk heq dorë nga kërkesa e saj, dallimet që rezultojnë prej saj në mesin e partnerëve të projektit do ta zvogëlonin mundësinë që projekti të hyjë në fazën e ardhshme siç është planifikuar, nga fundi i këtij viti, i tha agjencisë “Reuters” një burim i industrisë.
