Në Komunën e Shtimes është zbuluar një rast i rëndë i konfliktit të interesit dhe keqpërdorimit të parasë publike. Kryetari i Komunës, Qemajl Aliu nga Lëvizja Vetëvendosje, ka nënshkruar një vendim për ndarjen e 13 mijë eurove subvencione për Ansamblin e Këngëve dhe Valleve “Ilirida”, organizatë që drejtohet nga kandidati i tij për Asamblenë Komunale, Besnik Brahimi.
Dokumenti zyrtar, i datës 13 gusht 2025, mban firmën e kryetarit Aliu dhe konfirmon ndarjen e fondeve për këtë OJQ.
Përfaqësues i autorizuar dhe drejtor ekzekutiv i saj është pikërisht Brahimi, i cili vetëm një ditë më pas, më 14 gusht, shpalli publikisht kandidaturën për asamblist në listën zgjedhore të Vetëvendosjes.
Në publikimin e tij në rrjetet sociale, Brahimi falënderoi kryetarin Aliu, duke e cilësuar “kampion” dhe duke konfirmuar se është pjesë e “listës fituese”.
Ndërkohë, opozita në Shtime ka reaguar ashpër, duke e cilësuar këtë rast shembull tipik të shfrytëzimit të OJQ-ve si mbulesë për financimin e kandidatëve partiakë.
Rrahman Jakupi nga PDK ka kërkuar hetim urgjent nga Prokuroria dhe organet e auditimit, duke theksuar se “është e papranueshme që paraja publike të shndërrohet në mjet për blerje të ndikimit politik”.
Gazeta Insajderi ka tentuar të marrë një përgjigje nga vetë Besnik Brahimi, mirëpo ai ka qenë i paqasshëm në telefon. Pyetjet janë dërguar edhe përmes emailit, por deri në momentin e publikimit të këtij shkrimi, ai nuk ka dhënë asnjë sqarim.
