Rebelët e M23 vranë të paktën 140 persona në Republikën Demokratike të Kongos muajin e kaluar në një nga mizoritë më të rënda nga grupi i armatosur që nga ringjallja e tij në fund të vitit 2021, tha Human Rights Watch në një raport.
Kjo ndodh pavarësisht një procesi paqeje, të ndërmjetësuar nga SHBA-të dhe Katari, për t’i dhënë fund konfliktit në rajon.
Dëshmitarët i thanë grupit të avokimit se rebelët e mbështetur nga Ruanda “ekzekutuan menjëherë” banorët vendas, përfshirë gra dhe fëmijë, kryesisht nga grupi etnik Hutu në zonën Rutshuru, pranë Parkut Kombëtar Virunga, shkruan BBC, transmeton Gazeta Express,
Rebelët më parë kanë mohuar çdo rol në këto vrasje, duke i quajtur akuzat një “keqinterpretim flagrant të fakteve”.
Masakra e supozuar duket se ka ndodhur gjatë një fushate të M23 kundër një grupi të armatosur Hutu, FDLR, të formuar nga autorët e gjenocidit të vitit 1994 në Ruandën fqinje.
HRË tha se vrasjet totale në korrik mund të kalojnë 300, duke mbështetur gjetje të ngjashme nga OKB-ja në fillim të këtij muaji.
Luftërat midis trupave qeveritare dhe M23 u përshkallëzuan në janar, kur rebelët pushtuan pjesë të mëdha të lindjes së pasur me minerale, përfshirë kryeqytetin rajonal Goma.
Mijëra njerëz janë vrarë dhe qindra mijëra civilë janë detyruar të largohen nga shtëpitë e tyre në konfliktin e vazhdueshëm, thotë OKB-ja.
