Lionel Messi ka lënë gjurmë të pashlyeshme në botën e futbollit.
Ylli argjentinas nga shumëkush konsiderohet si futbollisti më i mirë në histori, duke i lënë prapa legjendat Pelle e Maradona.
35 vjeçari e kishte një rrugëtim të vështirë të karrierës me probleme fizike kur ishte fëmijë, të cilat lehtë mund ta linin pa u marrë me futboll, shkruan “Gazeta Express”.
Por, Messi e mblodhi forcën dhe eci përpara me punë, derisa talentin e kishte tashmë në xhep.
Në gati 20 vjet karrierë, argjentinasi ka fituar gjithçka të mundshme në karrierë.
Ndërkohë, ai ka vendosur edhe rekorde të pabesueshme dhe të paimagjinueshme.
T’i përmendim ato një nga një.
Siç dihet, pjesën më të madhe të karrierës, Messi e kaloi në Barcelonë, aty ku u bë idhull për tifozët.
Pa diskutim, në Camp Nou ai i vendosi disa rekorde, të cilat me gjasë janë të paarritshme.
Messi ka shënuar qindra gol në karrierë, por viti 2012 ishte special për të.
Në atë kohë 25 vjeçar, futbollisti nga Rosario e Argjentinës i kishte realizuar plot 91 gola brenda një viti kalendarik.
Imagjinojeni, 91 gola, një shifër që shumë futbollistë nuk arrijnë ta kapin gjatë krejt karrierës.
Me këtë rast, Messi e theu rekordin e legjendës gjermane, Gerd Muller me 85 gola brenda një viti kalendarik, të vendosur 40 vjet më herët.
Po ashtu, në atë sezon, kampioni i botës e kishte regjistruar edhe një rekord të jashtëzakonshëm në kampionatin spanjoll.
Messi i kishte shënuar plot 50 gola në 37 ndeshje të zhvilluara në sezonin 2011/12 në La Liga. Kjo shifër duket vërtetë e frikshme…
Gjithashtu, Messi njihet edhe për asistime, shkruan “Gazeta Express”.
Sulmuesi argjentinas e mban rekordin edhe në këtë aspekt.
Leo i ka shërbyer bashkëlojtarët në shënimin e golave plot 192 herë në La Liga, një rekord absolut.
Se Messi ka lënë gjurmë të pashlyeshme në Spanjë, e tregon edhe një fakt tjetër.
Argjentinasi në fakt i ka shënuar 474 gola në La Liga, një tjetër rekord i hatashëm ky, që është vështirë të imagjinohet se mund të thyhet.
Messi e ka fituar më së shumti në histori trofeun e Këpucës së Artë, si golashënuesi më i mirë në Evropë.
Ai e ka fituar gjashtë herë këtë çmim duke e lënë prapa Cristiano Ronaldon, i cili e ka fituar katër herë Këpucën e Artë.
Messi e mban rekordin edhe për më së shumti “Pichichi” të fituar, që i bie golashënuesi më i mirë në La Liga.
Veterani i sulmit e ka fituar këtë çmim prestigjioz plot tetë herë.
Ndër të tjera, Messi e ka bërë historinë edhe me Argjentinën.
Ai e mban rekordin për më së shumti kontribute në gola në Kampionate Botërore.
Messi ka kontribuuar në plot 21 gola të “Albiceleste”, me të cilët më në fund e fitoi Kupën e Botës, duke u kompletuar si futbollist.
E futbollisti i deridjeshëm i Paris Saint-Germainit e ka fituar më së shumti edhe çmimin më prestigjioz individual – Topin e Artë.
Gjeniu i futbollit është në pronësi të 7 Topave të Artë, një rekord ky që mund të thyhet vetëm nga Messi.
Po pra, e keni lexuar mirë, shkruan “Gazeta Express”.
E themi këtë pasi argjentinasi është favorit për ta fituar sivjet Topin e Artë numër 8 në karrierë.
Në total, Messi i ka zhvilluar 1028 ndeshje në karrierë, ndërsa i ka shënuar 807 gola.
Ai i ka realizuar 672 gola me Barcelonën, 32 me Paris Saint-Germainin dhe 103 me Kombëtaren e Argjentinës.
Messi u nda së fundmi me klubin francez dhe të gjithë e prisnin dhe e dëshironin një rikthim të tij në Barcelonë.
Por, 35 vjeçari i befasoi të gjithë duke e zgjedhur klubin amerikan, Inter Miami, për vitet e fundit të karrierës, ndonëse kishte oferta stratosferike nga Arabia Saudite.
Pasi i arriti të gjitha, Messi vendosi të luajë në një ligë të nivelit më të ulët, ku mund të luajë i qetë, pa presion dhe pa i dhënë shumë zor, në perëndim të një karriere përrallore.
Me të vërtetë, jemi me fat që e kemi shijuar epokën e fenomenit të futbollit dhe të jashtëtokësorit, Leo Messi. /Gazeta Express/
