Pas disa muajve shtyrje, Pentagoni këtë javë do ta përzgjedhë kompaninë e mbrojtjes për dizajnimin dhe prodhimin e aeroplanit luftarak të gjeneratës së ardhshme të Marinës së Shteteve të Bashkuara, thanë një zyrtar amerikan dhe dy njerëz të afërt me vendimin.
Ky projekt është multimiliardësh dhe do t’i kushtohet një aeroplani që shihet si kyç në përpjekjet e Uashingtonit për t’iu kundërvënë Kinës, raporton agjencia e lajmeve “Reuters”.
Vendimi për të lëvizur përpara me përzgjedhjen e kompanisë u mor të premten nga sekretari i Mbrojtjes, thanë zyrtari amerikan dhe njëri nga personat e afërt me çështjen.
Marina e ShBA-së mund ta njoftojë kompaninë fituese për prodhimin e aeroplanit të ri të saj hiç më larg se këtë javë, tha njëri nga burimet. Sidoqoftë, pengesat e çastit të fundit e kanë shtyrë procesin në të kaluarën dhe mund të bëjnë një gjë të tillë përsëri, sipas burimeve.
Marina e Shteteve të Bashkuara dhe Departamenti i Mbrojtjes (Pentagoni) nuk iu përgjigjën menjëherë disa kërkesave për koment.
Projekti “F/A-XX” pritet të sjellë një aeroplan me kapacitete të avancuara, rreze të përmirësuar veprimi dhe qëndrueshmërie si dhe aftësinë për t’u integruar edhe me aeroplan luftarakë pa pilotë, edhe me sisteme të mbrojtjes ajrore me bazë në aeroplanmbajtëse.
Një mosmarrëveshje rreth financimit në pranverë dhe verë mes Pentagonit dhe Kongresit të ShBA-së e kishte shtyrë avancimin e programit.
Pentagoni kërkoi 74 milionë dollarë që projekti për aeroplanin në mënyrë që të mbahej në “fondin minimal të zhvillimit”, por disa zyrtarë të Departamentit të Mbrojtjes kishin kërkuar që ta shtynin programin deri në tri vjet, duke i përmendur shqetësimet për inxhinierimin dhe kapacitetin e zinxhirit furnizues, kishte raportuar në maj agjencia “Reuters”.
