Pas rinumërimit të gati gjysmës së vendvotimeve, për të cilat KQZ ka vendosur që të shkojnë në rinumërim, janë shpërfaqur dallime të theksuara tek disa kandidatë për deputet tek partitë politike, duke ngritur shqetësime dhe reagime për vjedhje të votave brenda vetë partive.
Kujtojmë që KQZ më 13.01.2026 mori vendim për rinumërimin e fletëvotimeve në 914 vendvotime.
Dallimin më të madh në vota, sipas të dhënave të KQZ-së, janë në Partinë Demokratike të Kosovës (PDK), ku disa kandidatëve të kësaj partie pas rinumërimit u kanë dalë mijëra vota minus.
Përshembull, kandidatit Fetah Paçarizi pas rinumërimit të votave, ka minus 5 mijë e 294 vota.Pas tij nga PDK që ka dallim më të madh të votave, është Nait Hasani me minus 2 mijë e 972 vota. Pastaj vjen Kujtim Gashi me minus 2 mijë e 133 vota dhe Luljeta Veselaj Gutaj me minus 1 mijë e 819 vota. Top pesë kandidatët me dallimin më të madh në vota pas rinumërimit te PDK e përmbyll kandidati Arianit Çollaku me minus 1 mijë e 597 vota
Nga Lidhja Demokratike e Kosovës, sipas të dhënave të përditësuara të KQZ deri në ora 13:35 të 18 janarit, kandidati me dallimin më të madh në vota pas rinumërimit, është Xhavit Uka me minus 1 mijë e 432 vota.
Pas tij vjen Driton Selmanaj me minus 973 vota. Pastaj vjen Anton Quni me minus 510 vota. Pas tij vjen Visar Azemi me minus 398 vota dhe i pesti është Ardian Shala me minus 148 vota.Tek Lëvizja Vetëvendosje kandidati me dallimin më të madh në vota pas rinumërimit është Arbër Rexhaj me minus 613 vota, pas tij është kandidatja Rea Krasniqi me minus 535 vota. Pas saj është kandidatja Dafina Alishani me minus 445 vota. Pastaj vjen kandidati Valon Ramadani me minus 431 vota dhe top pesshen te VV-ja për dallimin më të madh në vota e përmbyll Mytaher Haskuka me minus 283 vota.
Tek Aleanca për Ardhmërinë e Kosovës (AAK) dallimi në vota tek kandidatët ka qenë paksa më i vogël, në dallim me partitë e tjera.Dallimin më të madh e ka pasur kandidati Besnik Krasniqi me minus 264 vota, pas rinumërimit. Pas tij vjen kandidatja Tringa Morina me minus 170 vota.
Pas saj është kandidati Burim Ramadani me minus 121 vota. Pastaj është kandidati Edmond Hoxha me minus 120 vota. Ndërsa top pesshen te AAK e përmbyll kandidatja Diellza Fetoshi, me minus 82 vota, pas rinumërimit.
Valmir Elezi, zëdhënësi i KQZ-së kishte deklaruar për KALLXO.com se rinumërimi i këtyre 36% të vendvotimeve, mund të zgjasë 12 deri në 14 ditë.
Në anën tjetër, kryetari i Aleancës për Ardhmërinë e Kosovës (AAK), Ramush Haradinaj, ka kërkuar rinumërim të tërësishëm të votave për kandidatë të zgjedhjeve të 28 dhjetorit 2025.
Përmes një postimi në rrjetin social Facebook, Haradinaj ka thënë se rinumërimi i pjesshëm i votave të kandidatëve po e nxjerr në shesh, sipas tij, një skemë manipulimi të përmasave shqetësuese të votës së qytetarit.
“Procesi i këtyre zgjedhjeve qysh sot është lënduar dhe pas këtyre gjetjeve, vota duhet të rinumërohet një për një. Pa rinumërim të tërësishëm, nuk sigurohet integriteti i këtyre zgjedhjeve. E habitshme qysh Prokuroria nuk është vënë në lëvizje qysh sot. Demokracia nuk mund të jetë viktimë e një grushti hajdutësh” – ka shkruar Haradinaj.
Ndërsa Partia Demokratike e Kosovës (PDK) ka thënë se indikacionet për manipulim të votës që janë shfaqur pas rinumërimit të disa vendvotimeve në disa komuna, janë të papranueshme.Përmes një komunikate për media, PDK ka thënë se vota e qytetarëve është e shenjtë dhe çdo trajtim, sipas tyre, jokorrekt ose përpjekje për manipulim shkelë parimet demokratike që PDK mbronë.“Standardi ynë është i qartë dhe çdo votë duhet të trajtohet me të njëjtin respekt dhe kujdes, nga momenti i hedhjes deri në certifikimin përfundimtar të rezultateve.Eliminimi i çdo dyshimi është në interes të kandidatëve, institucioneve dhe qytetarëve” – thuhet në komunikatë.Deputeti i zgjedhur i LDK-së, Anton Quni, ka thënë se dallimi në votat e tij pas rinumërimit në Qendrën e Numërimit në Prizren, është bërë pa dashjen dhe dijeninë e tij.Përmes një postimi në Facebook, Quni ka thënë se nuk ka kërkuar, inkurajuar apo asistuar në asnjë formë devijimin e vullnetit të qytetarëve.“Përmes këtij operacioni, i cili nuk mund të cilësohet ndryshe veçse si kriminal, më është njollosur personaliteti dhe karriera. Përfshirja e emrit tim në skema të tilla manipuluese është një goditje e rëndë për dinjitetin tim dhe besueshmërinë që kam ndërtuar me vite para elektoratit” – ka shkruar Quni.
