Cristiano Ronaldo mund ta bëjë një rikthim sensacional në futbollin evropian gjatë verës që vjen.
Veterani portugez është duke i kaluar muajt e fundit të kontratës me Al Nassr dhe nuk dihet ende nëse do të vazhdojë eksperiencën në Arabinë Saudite apo jo.
Muajin tjetër, “CR7” do t’i mbushë 40 vjet, por nuk ka shenja të plakjes e as të pensionimit eventual nga futbolli.
Përkundrazi, ai po vazhdon të shënojë gola me ekipin e tij në Saudi Pro League dhe ai e ka ndërmend të vazhdojë me ritëm të njëjtë, përcjell “Gazeta Express”.
Ish-futbollistit të Sporting Lisbonës, Manchester Unitedit, Real Madridit dhe Juventusit do t’i skadojë kontrata në verë dhe flitet se mund ta vazhdojë atë, ndërsa atë e do edhe klubi tjetër saudit, Al Hilal.
Al Nassr, nga ana e tij, nuk do ta ketë problem t’i përgjigjet pozitivisht kërkesave stratosferike për rrogë të 39 vjeçarit.
Por, rikthimi në Evropë duket një ide romantike, ndonëse vështirë e realizueshme pasi klubet e Kontinentit të Vjetër nuk kanë mundësi të paguajnë shumë, njëjtë sa në Arabinë Saudite.
Mediumi spanjoll “Fichajes” raporton se Ronaldo e konsideronte mundësinë e transferimit në Paris Saint-Germain, por që kampioni i Ligue 1 vendosi në fund kundër këtij transferi për arsye financiare.
Chelsea, Bayern Munich e Atletico Madrid raportohet se e kanë hedhur poshtë mundësinë që ta transferojnë Ronaldon, por thuhet se portugezi e ka dëshirën për t’u rikthyer në Evropë.
Por, mediumi në fjalë shkruan se ka klube angleze që e duan lojtarin, pa specifikuar emra.
Për ta bërë këtë dëshirë realitet nevojitet një sakrificë e madhe nga lojtari, pra një shkurtim i dukshëm i rrogës, ndonëse zërat flasin se ai është i lumtur me jetën në Arabinë Saudite.
Ronaldo po vazhdon të luajë edhe me Kombëtaren e Portugalisë, me të cilën i ka zhvilluar 217 ndeshje, ndërsa është lavdëruar me të madhe për punën dhe për përkushtimin e tij edhe nga trajneri i ri i Al Nassr, Stefano Pioli. /Gazeta Express/
