Ngjarja ndodhi në autostradën Tiranë–Durrës, familjarët hedhin dyshime se sulmi nuk ishte i rastësishëm.
Një ngjarje e rëndë ka tronditur ditën e sotme botën e medias. Gazetari dhe opinionisti i njohur për qëndrimet e tij të drejtpërdrejta dhe shpesh thumbuese, Elton Tozaj, ka rënë pre e një dhune brutale fizike.
banner
Lajmi është bërë publik përmes një njoftimi në profilin e tij zyrtar në Instagram, i shkruar nga familjarët e gazetarit. Sipas deklaratës, ngjarja ka ndodhur ditën e djeshme, rreth orës 19:30, në segmentin e autostradës Tiranë–Durrës.
Pamjet e publikuara janë tronditëse, ku Tozaj shihet me dëmtime të shumta në fytyrë dhe në zonën e syve. Familjarët bëjnë të ditur se gjendja e tij është kritike, duke theksuar se gazetari ndodhet “në luftë për të mos humbur shikimin” si pasojë e goditjeve të marra.
Përveç denoncimit të aktit të dhunës, deklarata e familjes përmban edhe një mesazh të fortë dhe të koduar drejtuar një personazhi publik të showbiz-it, emri i të cilit nuk bëhet i ditur, por që sipas tyre lidhet me rrethanat e ngjarjes.
“Kërkojmë veçanërisht që një personazh i showbiz-it, i cili frekuenton pikërisht këta persona, të distancohet publikisht sot dhe të sqarojë se çfarë e lidh atë vajzë me trekëndëshin Rruga Ura – Patok – Kodra e Diellit,” thuhet në deklaratë.
Ky detaj ka ngritur dyshime të forta se sulmi ndaj gazetarit mund të mos ketë qenë i rastësishëm, por i lidhur me konflikte apo prapaskena që përfshijnë emra të njohur të jetës publike. Sipas familjarëve, autorët e ngjarjes janë tashmë të identifikuar.
Elton Tozaj njihet për kritikat e tij të hapura ndaj fenomeneve sociale dhe figurave publike. Ndërkohë, pritet që policia të zbardhë rrethanat dhe motivet e kësaj ngjarjeje të rëndë.
