Anëtarët e stafit akademik të Universitetit “Fehmi Agani” në Gjakovë përmes një peticioni drejt ministrisë së Arsimit, Shkencës, Teknologjisë dhe Inovacionit kanë kërkuar shkarkimin e rektorit të këtij universiteti, Drilon Bunjaku, raporton Gazeta Online Veriu.info.
Sipas këtij peticioni të siguruar nga Veriu.info shihet se rreth 44 profesorë e asistentë duke përfshirë anëtarët e Këshillit Drejtues nga radhët e stafit akademik, dekanët e të gjitha njësive akademike, si dhe shumicën e anëtarëve të Senatit, kanë kërkuar shkarkimin e Bunjakut, me arsyetimin se gjatë ushtrimit të mandatit të tij, rektori i Universitetit “Fehmi Agani” në Gjakovë, prof. ass. dr. Drilon Bunjaku ka ndërmarrë veprime dhe ka manifestuar qasje drejtuese që kanë cenuar funksionimin normal dhe ligjor të institucionit, duke prodhuar pasoja serioze në jetën akademike dhe institucionale të universitetit.
Ata thonë se shqetësimet e tyre janë konfirmuar dhe institucionalizuar edhe përmes qëndrimit zyrtar të katër anëtarëve të Këshillit Drejtues të Universitetit, të cilët publikisht kanë kërkuar shkarkimin e rektorit, duke vlerësuar se janë konsumuar shkelje dhe rrethana që e bëjnë të pamundur vazhdimin normal të ushtrimit të mandatit.
“Më konkretisht, me veprimet dhe frymën që ka sjellë rektori Bunjaku në institucionin tonë,
konsiderojmë se ai nuk na përfaqëson ne si komunitet akademik.” – thuhet në peticionin e stafit akademik.
Sipas këtij peticioni, stafi pretendon se rektori ka keqmenaxhuar buxhetin e universitetit.
“Akomodimi për udhëtime jashtë vendit – tejkalim i buxhetit të aprovuar 236.96%
Shërbimet e shtypjes/printimit – tejkalim i buxhetit të aprovuar 236.86%
Shërbime kontraktuese tjera – tejkalim i buxhetit të aprovuar 259.17%
Pajisje nën 1000 €- tejkalim i buxhetit të aprovuar 913.43%
Furnizim për zyre – tejkalim i buxhetit të aprovuar 178.50%
Mirëmbajtja e Tl-së – tejkalim i buxhetit të aprovuar 1,040.09%
Drekat zyrtare – tejkalim i buxhetit të aprovuar 194.96%
Këto tejkalime përbëjnë shkelje të rëndë buxhetore. papërgjegjësi në menaxhimin financiar dhe mungesë
kontrolli ” – thuhet në këtë dokument.
