Radio Televizioni i Kosovës nuk e ka përfshirë fare në edicioni qendror të lajmeve dorëheqjen e Ministrit në detyrë të Mjedisit, Planifikimit Hapësinor dhe Infrastrukturës, Liburn Aliut, shkaku i zgjedhjes së Dimal Bashës në krye të Kuvendit.
Në edicionin prej 34 minutash, as nuk përmendet Aliu.
Mospërfshirja e dorëheqjes së tij në lajme vjen vetëm disa orë pasi menaxhmenti i RTK’së hodhi poshtë pretendimet për censurë, e madje edhe me këtë reagim nisën lajmet.
Ndryshe, menaxhmenti i Radio Televizionit të Kosovës ka bërë një sqarim lidhur me përjashtimin e moderatorëve nga disa emisione duke thënë se këto janë vendime menaxheriale e s’kanë karakter ndëshkues, dhe se diçka e tillë po bëhet për shkak të rritjes së cilësisë në RTK, ndaj ka riorganizime të stafit, shkruan Reporteri.net.
Në komunikatë, RTK thekson se kontratat e tyre janë për redaktorë dhe të njëjtat mbesin të paprekura dhe se detyra e tyre lidhet me redaktim dhe mbikëqyrje editoriale, e jo me moderim.
Menaxhmenti i RTK-së thotë se lirimi nga pozita e moderimit është në përputhje me kontratat që ata kanë.
Sipas tyre, pretendimet për censurë nga redaktorët nuk qëndrojnë.
Madje në komunikatë RTK ka paralajmëruar pasoja për punonjësit të cilët siç thonë përhapin “dezinformata për të dëmtuar integritetin e institucionit”
‘Çdo deklarim i pabazuar në fakte, që përhap dezinformata duke dëmtuar integritetin e institucionit, nuk do të tolerohet tutje dhe të gjitha këto veprime do të trajtohen në përputhje me ligjin dhe rregulloret e RTK-së në fuqi”, thuhet mes tjerash në komunikatë.
