Agjencia e lajmeve, AFP, ka raportuar se Rusia do të zhvillojë ushtrime detare në pjesë të ndryshme të botës.
Më saktësisht, kjo agjenci raportoi se ushtrimet detare ruse do të zhvillohen në Oqeanin Atlantik, Oqeanin Paqësor, Oqeanin Arktik dhe në Detin Mesdhe.
Ndryshe, trupat ruse pritet që të zhvillojnë ushtrime të përbashkëta me ushtrinë bjelloruse muajin e ardhshëm në Bjellorusi. Një ministër i Lituanisë ka thënë se vendosja e trupave ruse në Bjellorusi është kërcënim i drejtpërdrejtë për vendin e tij.
Në kohën kur tensionet mes Perëndimit dhe Rusisë janë të larta shkaku i grumbullimit të trupave ruse afër Ukrainës dhe kërkesave të Rusisë për moszgjerimin e NATO-s, sekretari amerikan i Shtetit, po zhvillon vizita në Evropë. Ai të mërkurën ishte në Ukrainë, ndërsa të enjten po qëndron në Berlin. Të premten pritet të takohet me homologun rus, Sergei Lavrov, në Zvicër.
Presidenti amerikan, Joe Biden, ka thënë se mendon që Rusia do ta sulmojë Ukrainën, por gjithashtu do të përballej me një çmim për këtë veprim. Në anën tjetër, Rusia ka mohuar se ka plane për pushtimin e shtetit fqinj.
