Luan Gacaferi, kandidat i Lëvizjes Vetëvendosje për deputet, në një postim skandaloz të publikuar së fundi, u gëzohet problemeve shëndetësore të ish-presidentit Hashim Thaçi, i cili po mbahet në Hagë. Mes tjerash, ai e ka quajtur lajm të mirë edhe vazhdimin e paraburgimit.
Hashim Thaçi mungoi sot në gjykimin në Dhomat e Specializuara të Kosovës. Ai ka pasur probleme shëndetësore, dhe për këtë e ka pasur të pamundur pjesëmarrjen, siç ka konfirmuar avokati i tij, Luka Misetiq.
“As unë nuk kam informacion, sekretarja më njoftoi se klienti nuk ndihej mirë, dhe nuk mund të merrte pjesë në seancën e sotme. Nuk jam konsultuar fare me klientin lidhur me këtë. Mendova se ishte zgjidhur prej jush” – tha Mistiq.
Në një shkrim në rrjetin social Facebook, Gacaferi i njohur ndryshe edhe si “Luan fataliteti”, duke shprehur gëzimin e tij rreth kësaj, ka pyetur nëse ka lajme të tjera të mira.
“A ka naj lajm të mirë sot për Kosovën a jo!!!
Thaqi për shkaqe shëndetsore nuk merr pjesë në seancën gjyqësore, ju vazhdohet paraburgimi, Tahiri se kalon pragun, Haki Abazi i merr veç 1 vota, Ardian Kastrati se kalon pragun, Pay Pali po lufton për jetë a vdekje me pragun, Zafir Berishës ja kishin vjedh hakerat votat……… Hajr e boft Zoti se tjetër s’don njeri çka me thonë!” – ka shkruar ai.
Vlen të theksohet se Gacaferi, ishte komentuar shumë pasi në një shkrim kishte përdorur fjalën “fatalitet”, duke e pasur në mendje – bazuar në kontekstin e përdorimit – fjalën “natalitet”.
Gacaferi ishte prezantuar si kandidat për deputet nga Albin Kurti gjatë një tubimi në Gjakovë. Ky para simpatizantëve të VV-së kishte thënë:
“Unë po e filloj pak ma ndryshe prej tjerve. Maj men jam kan dikun në moshën 4-5 vjeçare po e ves babëgjyshin kur vjen pranvera te na në Kosovë, tha kur t’i sheh dallendyshet në qiell.
Një ditë po më vet dikush prej familjes, tha kur ka me u ba mirë në Kosovë, thash në Kosovë bëhet mirë kur ta shihni Luanin t’u ardhë prej diaspores në Kosovë, edhe tjerët me Luanin”.
Theksojmë se sipas rezultateve preliminare, Lëvizja Vetëvendosje ka dalë e para në këto zgjedhje duke marrë 40.84 për qind apo 341 mijë e 672 vota.
Nuk dihet nëse Gacaferi, ka marrë numrin e nevojshëm të votave për të fituar një ulëse në grupin e Lëvizjes Vetëvendosje në Kuvend.
