Këngëtarja e njohur, Filloreta Raçi – Fifi, ka hapur zemrën në një intervistë emocionuese me moderatoren Alketa Vejsiu, duke ndarë rrëfime të thella për udhëtimin e saj artistik, sfidat personale dhe sakrificat që i janë dashur për të arritur suksesin që ka sot.
Fifi ka treguar me shumë ndjeshmëri se hapat e saj të parë në muzikë ishin të mundësuar nga një veprim i paharrueshëm i nënës së saj, e cila, pa hezitim, i shiti florinjtë e saj për ta mbështetur vajzën në ndjekjen e ëndrrës së saj artistike.
“E mbaj mend sikur sot kur kam nisur të bëj muzikë, kur nëna ime mori florinjtë e saj dhe i shiti për të m’i dhënë mua, që të bëhesha unë,” ka thënë Fifi me emocion.
Megjithatë, rruga drejt suksesit nuk ka qenë e thjeshtë për këngëtaren. Ajo ka përshkruar një frikë të thellë që e ka shoqëruar gjatë krijimit muzikor, duke treguar ankthin se mund të humbte frymëzimin në momentin më të papritur.
“Kisha një frikë çka nëse harroj çfarë jam duke shkruar, atë vijën melodike që e kam bërë në kokë… çka nëse e harroj?” ka treguar ajo, duke ndarë një moment të ndjerë të pasigurisë që e ka shoqëruar në fillimet e saj.
Në rrëfimin e saj, Fifi gjithashtu ka reflektuar për marrëdhëniet personale dhe ndikimin që ato kanë pasur në gjendjen e saj emocionale.
“Askush nuk duhet me ardh me ta dhënë dorën, duhet të ngrihesh vetë. Fajtori i parë që ti e fajëson është partneri që ke në krah, sepse ti je verbuar prej asaj smirës që të kanë ushqyer të tjerët,” ka përfunduar ajo, duke reflektuar mbi përvojat e saj personale.
