Presidentja e vendit, Vjosa Osmani të martën ka marrë vendimin për të mandatuar Glauk Konjufcën për formimin e Qeverisë së re, pasi Lëvizja Vetëvendosje e dërgoi emrin e tij si kandidat për kryeministër.
E para e shtetit tha se e ka mandatuar Konjufcën në përputhje me Kushtetutën.
“Në përputhje me Kushtetutën dhe me të gjitha aktgjykimet e Gjykatës Kushtetuese, kam mandatuar z. Glauk Konjufca si kandidat tjetër për kryeministër, ashtu siç qartë e kërkon dhe e përcakton neni 95, pika 4, si edhe vetë praktika e Gjykatës Kushtetuese.
“Mandatimi i z. Konjufca është gjithashtu në përputhje me përgjegjësinë tjetër që Gjykata Kushtetuese ia ka dhënë presidentes në po të njëjtat aktgjykime, respektivisht, përgjegjësinë që presidentja të ruajë stabilitetin e vendit duke shmangur zgjedhjet. Ky është një detyrim i përcaktuar nga vetë Gjykata Kushtetuese”, ka thënë Osmani.
Pas kësaj, ajo tha se deputetët e Kuvendit të Kosovës duhet ta kenë parasysh formimin e qeverisë, sepse sipas saj, është e rëndësishme që të Kosova t’i ketë institucionet, pasi është periudhe e ndjeshme për vendin tonë, përfshirë kërcënimet ndaj sovranitetit nga Serbia.
“Mendoj që është e rëndësishme që në një periudhe kaq të ndjeshme në vendin tonë, përfshirë kërcënimet ndaj sovranitetit tonë nga Serbia, që ne të gjejmë rrugën përpara, që partitë politike shpresoj që të gjejnë mundësinë që në ditët në vijmë të kalohet plani i rritjes dhe së paku zgjatja buxhetore”.
“Ka mundësi që të bëhen gjëra të mira për këtë vend. Shpresoj shumë që të gjithë deputetët e Kuvendit të Republikës së Kosovës do ta kenë këtë parasysh. Të gjitha veprimet që po ndërmarr janë vetëm e vetëm në funksion të mbrojtjes së stabilitetit kushtetues dhe sigurimit të mirëqenies së qytetasve tanë që duhet të jenë prioritet”, tha Osmani.
E para e shtetit deklaroi më tej se qytetarët kanë humbur mjaftueshëm me moskrijimin e institucioneve, dhe se verdiktin final e japin 120 deputetët e Kuvendit të Kosovës, ndaj u shpreh që shpreson se partitë të arrijnë një dakordim dhe të shmangin zgjedhjet.
“Ka akoma hapësirë që partitë të arrijnë dakordim. Nuk dua të dorëzohemi nga përpjekjet. Dua të jem optimiste dhe dua që të gjitha partitë politike ta vendosin interesin e shtetit të parin, sepse shumë me më rëndësi se sa zgjedhjet të mbahen në cilën datë, është çka bëjmë në këtë hapësirë para zgjedhjeve. Shpresa ime është që ka hapësirë për diskutime mes partive”, ka thënë ajo.
Presidentja nuk e la pa folur edhe për aspektin kushtetues, se a përbën shkelje mandatimi i Glauk Konjufcën për formimin e qeverisë.
Ajo tha se Kushtetuta e obligon të veprojë në këtë formë.
“Unë veproj 100 për qind në përputhje me Kushtetutën, e cila nuk më ka lënë rrugë tjetër. Sepse diskrecioni është kur ke disa opsione dhe zgjedh mes atyre që kanë gjasat më të mëdha. Kurse kur ke vetëm një propozim, Kushtetuta thotë Presidentja mandaton. Pikë”, deklaroi Presidentja Osmani, teksa shtoi se “jam 100 për qind e sigurt që kam vepruar në përputhje të plotë me Kushtetutën”.
Pas mandatimit nga presidentja, Konjufca ka kohë 15 ditë që të paraqesë para Kuvendit të Kosovës, ekzekutivin e ri, që duhet t’i marrë të paktën 61 vota për.
Kujtojmë se Kurti mori 56 vota më 26 tetor, duke u bërë i pari në historinë e Republikës të cilit Kuvendi nuk ia votoi kabinetin.
