Ish kryetari i Vetëvendosjes në Mitrovicë dhe tashmë Kryeshefi Ekzekutiv i kompanisë publike “Ibër Lepenc” Faruk Mujka, ishte arrestuar vitin e kaluar nën dyshimin për korrupsion sa ishte nënkryetar i komunës së Mitrovicës. Me rastin e arrestimit, atij i ishin sekuestruar nga policia gjashtëdhjetë mijë (60.000.00) euro, të cilat i janë gjetur në banesë të padeklaruara.
Sekuestrimi i 60 mijë euro duket se Faruk Mujkës nuk ia ka lënë “shenjë”, pasi që ai së bashku me dy ortakë ka hapur një kompani në Gjermani dhe një kompani në Kosovë për shitjen e materialit elektrik, raporton Veriu.info.
Këtë e ka bërë të ditur sot vet Faruk Mujka përmes një postimi në Facebook, duke treguar “DEUTCHE ELEKTRIK” gjindet në magjistralen Mitrovicë – Prishtinë, tek rrethrrotullimi kryesor i Vushtrrisë, me ç’rast ka publikuar edhe disa fotografi nga ceremonia solemne e hapjes.
Në deklarimin e pasurisë për vitin e kaluar, Faruk Mujka, nuk ka deklaruar se ka biznes tjetër. Por se si u fut në biznes ndërkombëtar të materialit elektrik, duke qenë se ka deklaruar se jeton nga pagat, këtë mund ta dinë vetëm ai.
Ajo çka dihet është se ndërmarrja “Ibër Lepenc” ku Faruk Mujka është Kryeshef Ekzekutiv, veprimtarinë e parë të radhitur edhe në ueb faqe e ka gjenerimin e energjisë elektrike.
Se a do të ketë ndërlidhje mes veprimtarisë publike me gjenerimin e energjisë elektrike ku është Kryeshef dhe shitjes së materialit elektrik në kompaninë e tij private, kjo mbetet të shihet, pasi që nëse ka ndërlidhje mund të jetë konflikt interesi./Veriu.info
