Në komisionin për arsim është diskutuar shtimi i orëve të edukatës fizike nëpër shkolla, Musa Selimi- Dekan i Fakultetit të Edukimit Fizik dhe Sportit, ka thënë se 2 orë në javë janë të mangëta. Pas kërkimit të shtimit të orëve të edukatës fizike, Dekani i Fakultetit të Edukimit Fizik dhe Sportit, Musa Selimi, ka thënë se kjo është një kërkesë e kamotshme e punëtorëve.
I ftuar në emisionin “Rreth e Rrotull”, Selimi ka thënë “Kemi gjetur një mbështetje nga kryetari i Komisionit për Arsim Sport dhe Kulturë, profesor Adrian Gola, që ne të shfaqim një hulumtim që ka të bëjë me mungesën e gjendjes fizike të mirë dhe shëndetësore të fëmijëve dhe adoleshentëve.”
Selimi tha se në kuadër të fakultetit me një mostër prej 2 mijë fëmijëve të klasave të 6 dhe 7, kur janë krahasuar me vendet në rajon, ka dalë që gjendja shëndetësore e fëmijëve tanë nuk është e mirë.
“Ne kemi bërë kërkesa edhe në qeveritë e mëhershme, nuk është që nuk e kanë përkrahur, por veprime direkte dhe konkrete nuk kemi pasur,” shtoi ai.
Sipas tij, rekomandimet e Organizatës botërore të shëndetësisë janë se secili fëmijë duhet t’i ketë së paku 60 minuta aktivitet fizik në ditë, ndërsa në Kosovë janë 2 orë në javë që janë të pakta dhe të mangëta./Dukagjini/
