Lidhur me njoftimin nga Ministria e Arsimit për largimin e 629 nxënësve së bashku me familjet e tyre nga Kosova, ka reaguar edhe Sindikata e Bashkuar e Arsimit, Shkencës dhe Kulturës e Republikës së Kosovës,SBASHK.
Sipas Vjollca Shala, nënkryetare e SBASHK-ut nëse vazhdon situatë e njëjtë e largimit të nxënësve, atëherë shkollat do të boshatisen.
“Emigrim i tillë ka pasoja të mëdha dhe është gjendje alarmante që duhet të reagojnë të gjitha institucionet, në këtë rast Ministria e Arsimit duhet që të ndërmarrë veprime të shpejta sa nuk është bërë vonë. Shkollat tona po boshatisen nga nxënësit po në të njëjtën kohë edhe nga mësimdhënësit”- tha ajo në një prononcim për GazetaBlic.
Sipas saj, arsyet që po qojnë në largimin e nxënësve dhe mësimdhënësve nga vendi janë kushtet jo të mira të vendit të punës dhe kërkimi i një mirëqenie më të mirë.
“Ky numër kaq i lartë i nxënësve bart me vete edhe një numër të madh të mësimdhënësve të cilët dita ditës po lëshojnë Kosovën, po shkojnë në shtete të ndyshme të Evropës sepse po gjejnë kushte më të mira të punës, mirëqenie sociale më të mirë. Vetë numri i publikuar nga Ministria e Arsimit për emigrim të mbi 600 nxënësve lë për të kuptuar se kushtet e punës në shkollat e Kosovës, nuk janë ato të dëshirueshme” u shpreh Shala.
Ajo tutje theksoi edhe mungesën e mësimdhënësve në lëndët deficitare si matematikë, fizikë dhe shkenca të tjera në disa komuna.
Shala potencon se ndër shkakatrët kryesor që qon në një situatë të tillë është edhe mos konstituimi i institucioneve që nga zgjedhjet e 9 shkurtit.
“Një gjë të tillë e shkakton edhe mos konstituimi i institucioneve përgjegjëse që nga 9 shkurti, shkakton pasiguri dhe pasiguria e krijuar në Kosovë, e krijon hapësirën për emigrim edhe të nxënësve e mësimdhënësve”- tha ajo.
Sipas saj, të gjitha komunat janë të prekura nga ky emigrim, pa përjashtim.
“SBASHK-u ka adresuar tek Ministria e Arsimit edhe më herët këtë shqetësim, të largimit të punëtorëve të arsimit, kryesisht të mësimdhënësve por sikur ka hasur në vesh të shurdhër”- përfundoi Shala.
