Ekonomisti Shenoll Muharremi ka reaguar ashpër ndaj vendimit të Qeverisë në detyrë për të proceduar pagesat prej 100 euro për studentët vetëm dy ditë para balotazhit, duke e cilësuar këtë veprim si tentim për blerje votash dhe mashtrim elektoral.
Sipas tij, vlera reale e atyre 100 eurove është zhvlerësuar ndjeshëm që nga viti 2021 dhe sot përkthehet në rreth 65 euro, për shkak të rritjes së çmimeve dhe kostos së jetesës.
“Mos të harrojmë që ato €100 të dhëna sot kanë vlerën reale të rreth €65 nga viti 2021. Aq shumë është keqmenaxhuar ekonomia dhe janë rritur çmimet dhe kostoja e jetës”, ka shkruar Muharremi.
Ai ka theksuar se kjo lëvizje e qeverisë nuk lidhet me përkrahjen e studentëve, por me fushatën zgjedhore.
“Sot po tentohet të blihet vota e qytetarit, studentit, me 100 euro me paranë publike. Kjo quhet korrupsion elektoral i pastër, sepse po ndodh tri ditë para balotazhit”, tha ai.
Muharremi shtoi se kjo pagesë nuk zgjidh problemet e arsimit apo të studentëve, por i thellon sfidat ekonomike të vendit, duke theksuar se një pjesë e madhe e mjeteve do të shkojë jashtë vendit përmes importit dhe deficitit tregtar.
“Sot studenti nuk po ndihmohet, po blihet, po mashtrohet dhe Kosova po varfërohet”, përfundoi ai.
