Analisti politik, Shenoll Muharremi ka hedhur një parashikim të fortë për zgjedhjet eventuale të pranverës në vitin 2026 duke përdorur fjalën “tërmet” për të bërë një përshkrim për atë se çfarë mund të ndodhë në skenën politike kosovare, shkruan Mitropol.
Sipas Muharremit sugjerohet se partia e Albin Kurtit rrezikon që të humbasë zgjedhjet nëse nuk fillon që të ndryshojë drejtim.
Sipas tij, “LVV nuk ka më frymë, e as koha më nuk po punon për të.” Ai thekson se kjo parti po humb përkrahjen nga kulmi prej 50.2% në vitin 2021, ndërsa përmend edhe që “rreth 80% e qytetarëve e fajësojnë për bllokadën në Kuvend.”
Një pikë tjetër e rëndësishme që përmend Muharremi është edhe ndikimi i Presidentes aktuale, Vjosa Osmanit nëse ajo vendos që të garojë për një mandat të dytë, duke e cilësuar atë si “politikanja më e popullarizuar dhe aprovuar në publik”
Ai nuk përjashton as ndonjë skenar ku LDK-ja mund të dalë e para, por vetëm nëse e rikthen Osmani-n dhe fuqizon Hykmete Bajramin – ndonëse, siç shkruan ai, “gjasat nuk janë të mëdha kjo me u realizu”.
“Çka ndodhë saktësisht askush nuk e di dhe mvaret prej shumë faktorëve. Por nëse asgjë nuk ndryshon dramatikisht… kjo mundet me ndodhë” shton në fund Muharremi.
