Ilir Tasholli deri para një jave ishte kandidat për kryetar të Komunës së Lipjanit nga radhët e Aleancës për Ardhmërinë e Kosovës. Tasholli dha dorëheqje për “arsye objektive”. Sot, ai njoftoi që do t’i bashkëngjitet Lëvizjes Vetëvendosje në Lipjan.
“Bashkë me disa prej përkrahësve të dashur, sot iu bashkuam Lëvizjes Vetëvendosje e cila më së miri mishëron vullnetin për ndryshim, transparencë dhe zhvillim të qëndrueshëm për Lipjanin dhe për gjithë vendin.
Në këtë rrugëtim të ri, do të jemi në përkrahje të mikut tonë, kandidatit per Kryetar të Lipjanit nga Lëvizja Vetëvendosje, z. Ilir Qeriqi, me të cilin ndajmë vizionin për një qeverisje lokale të ndershme, të përkushtuar dhe të afërt me qytetarët e Lipjanit“, thuhet ndër të tjera në njoftimin e sotëm të Tashollit.
Gjithsesi, para një jave Tasholli kishte njoftuar që për arsye objektive po tërhiqet nga kandidatura për kryetarin e Lipjanit nga radhët e AAK’së.
“Dua t’ju njoftoj se, për arsye objektive, kam vendosur të ndal aktivitetin tim politik brenda Aleancës për Ardhmërinë e Kosovës, të tërhiqem nga kandidatura për Kryetar të Komunës së Lipjanit, si dhe nga të gjitha funksionet që kam ushtruar deri më tani“, ka thënë ndër të tjera para një jave ai.
Tasholli përveç garës për zgjedhje lokale, në zgjedhjet parlamentare të këtij viti garonte me listën e AAK’së.
Ilir Tasholli ishte pjesë e Lidhjes Demokratike të Kosovës në Lipjan para 2021-ës. Ai ishte një mandat si deputet nga radhët e këtij subjekti politik.
Madje, gjatë kohës para se ta linte në LDK’në, për Tashollin flitej se po i bashkëngjitet Vetëvendosjes.
“Për të gjithë ata, të cilët po flasin dhe po mendojn se Ilir Tasholli po largohet dhe po e lë LDK-në për Vetëvendosjen, ne i përgënjeshtrojm të gjitha këto informacione, duke ju thënë se ai, është pranë LDK-së më shumë se kurrë më parë, i angazhuar duke punuar për fitore”, thuhej në një shkrim të një nga faqet e simpatizantëve të LDK’së.
