Shkrimtari dhe analisti nga Shkupi, Kim Mehmeti, është shprehur tejet kritik me kryeministrin Albin Kurti në lidhje me përkrahjen e dhënë për VMRO-DPMNE-në dhe partnerët e saj shqiptarë.
Në një nga shkrimet e fundit të afishuara në faqen e tij në ‘Facebook’, ai i ka cilësuar si “paçavura” përfaqësuesit e VLEN-it.
“Dhe mbase kurrë si sot, përfaqësuesit shqiptarë nuk i janë frikuar gjithaq sunduesit maqedonas sa këto paçavuret e VLEN-it, të cilët edhe kur gazetari i pyet nëse e dinë përmendësh himnin shqiptar, për të dëshmuar se janë promaqedonas të denjë, ata përgjigjen se atë e dinë pjesërisht”, ka shkruar Mehmeti.
I njohur për mbështetjen aktive për kryeministrin në ikje të Kosovës, analisti nga Shkupi e ka kritikuar Kurtin se me ndërhyrjen e tij në zgjedhjet e fundit parlamentare në Maqedoni i ka përçarë shqiptarët politikisht “edhe më shumë seç janë të copëtuar”.
“Gjithashtu është e padyshimtë se një politikan i kalibrit të Kurtit e di se VMRO-ja e sotme i provokon shqiptarët e këtushëm sepse do që ata të reagojnë, me çka do hapej rruga për rishikimin e gjitha marrëveshjeve të arrira deri tani, ngaqë sipas tyre, në një Maqedoni që u takon vetëm maqedonasve, shqiptarëve u është dhënë më shumë seç u takon”, ka shkruar Mehmeti.
“Dhe nëse është e padiskutueshme se një politikan i kalibrit të Kurtit e di që Maqedonia kurrë nuk ka pasur qeveri më proserbe se kjo e sotmja, mbetet e paqartë pse ai i mbështet ata që erdhën në pushtet duke i trembur maqedonasit se shtetin ua kishin marr shqiptarët dhe duke u premtuar se nëse do votonin për VMRO-DPMNE-në ajo atë do ua kthente pronarëve të saj – maqedonasve”.
