Aleanca Kosovare e Biznesit ka ngritur alarm për pasojat e shmangies së arkave fiskale, duke theksuar se kjo dukuri po dëmton rëndë buxhetin e shtetit dhe po krijon kushte të pandershme për konkurrencën në treg.
Kryetari i AKB-së, Agim Shahini, paralajmëroi se nëse ky fenomen vazhdon, do të ketë pasoja të rënda për ekonominë dhe për shtetin.
“Nëse vazhdojmë kështu, do kemi më shumë ekonomi joformale, më pak të ardhura për shtetin dhe një klimë biznesi që shpërblen të pandershmit”, theksoi Shahini.
Ai theksoi se problemi nuk është thjesht te kostoja e teknologjisë fiskale, por në një sistem të dobët kontrolli dhe moszbatimin e ligjit.
“Ne si AKB, vlerësojmë se shmangia e arkave fiskale nuk është vetëm çështje kostoje, por pasojë e një sistemi të dobët kontrolli. Kur mungon mbikëqyrja dhe ligji nuk zbatohet njësoj për të gjithë, krijohen hapësira të mëdha për abuzim”, shtoi ai.
Për këtë arsye, Shahini kërkoi që institucionet të adresojnë boshllëqet ligjore, të vendosin kontrolle të barabarta dhe të ulin koston e teknologjisë fiskale. “
Bizneset e rregullta, që punojnë me arka fiskale dhe paguajnë taksa, po ndëshkohen padrejtësisht dhe po humbin klientë dhe treg, ndërsa bizneset që shmangin detyrimet ligjore po pasurohen”, përfundoi ai.
