Për më shumë se 10 vite, mirëmbajtja e siupërfaqeve të gjelbëruara ka qenë pikë e dobët për qytetin e Mitrovicës, pasi që kujdesi për to ka qenë minimal dhe jobashkëkohor. Mirëpo, gjendja e gjelbërimit në Mitrovicë pritet të ndryshoj në mënyrë drastike në kuptimin pozitiv tash e tutje.
Komuna e Mitrovicës ka zhvilluar procedurat tenderuese me titull: “Mirëmbajtja,ngritja dhe revitalizimi i sipërfaqeve të gjelbëruara dhe parqeve në qytet”, raporton Veriu.info.
Veriu.info ka siguruar dokumentacionin zyrtar, ku shihet se operatori ekonomik “EING COM” Sh.P.K. ka dalë fitues i kësaj kontrate dy vjeçare në vlerë prej 600 mijë euro.
Detyrë e kompanisë fituese të tenderit është përkujdesja për sipërfaqet e gjelbëruara ku hyn edhe kositja e rregulltë e barit, bartja e barit deri në deponi. Këtu ka një ndryshim pozitiv pasi që kompania që deri më tash e ka mirëmbajtur gjelbërimin, barin e mbledhur nuk e ka dërguar asnjëherë në deponi, përderisa nga kompania për menaxhimin e mbeturinave zakonisht janë ankuar se kjo kompani private po ua mbush kontejnerët e mbeturinave me bari të prerë.
Po ashtu kompania fituese tash e tutje do të bëjë rivitalizimin e hapësirave gjelbëruese te dëmtura në qytet, të cilat janë të shumta.
Në këtë tender kanë aplikuar edhe grupi i operatorëe “Hydro Ing Sh.P.K – Viante Konstruksion” dhe operatori ekonomik “Gani Mlinaku” B.I., por që të dyja janë shpallur të papërgjegjshme, pasi që nuk i kanë plotësuar kriteret e tenderit.
“Hydro Ing Sh.P.K – Viante Konstruksion” nuk e ka plotësuar kushtin minimal për qarkullim financiar në tre vitet e fundit dhe nuk ka ofruar kontrata të ngjashme të përfunduara me sukses në tre vitet e fundit.
Operatori ekonomik “Gani Mlinaku” B.I. është elinimuar dhe shpallur i papërgjegjshëm, pasi që në kushtet e tenderit është kërkuar që kompanitë aplikuese të kenë “citernë minimum 7000 litra për ujitjen e gjelbërimit dhe drunjëve me vetëmbushje dhe vetëshkarkues”, përderisa kompania “Gani Mlinaku” B.I. në vend të saj ka prezantues pajisjen “Rimorkio bujqësore për shpërndarjen e urinës së bagëtive në toka pjellore”, e cila sipas komisionit nuk përputhet me specifikat teknike dhe kërkesat e përcaktuara në dokumentacionin e tenderit.
Kompania e eliniminuar për prezantim të pajisjes “Rimorkio bujqësore për shpërndarjen e urinës së bagëtive në toka pjellore”, “Gani Mlinaku” B.I. (emri tregtar: N.SH. ” AMBIENTI.G) deri më tash për më shumë se 10 vite e ka pasur nga Komuna e Mitrovicës kontratën për mirëmbajtje të gjelbërimit, ku nuk dihet nëse deri më tash me këtë pajisje i ka ujitur hapësirat gjelbëruese./Veriu.info
