Agjencia prestigjioze e lajmeve, Reuters, ka raportuar lidhur me kërkesën e kryeprokurores së Zyrës së Prokurorit të Specializuar, Kimberly West, që të dënohen me nga 45 vite burg secili nga ish-krerët e Ushtrisë Çlirimtare të Kosovës.
Në artikullin e tyre, thuhet se “prokurorët ndërkombëtarë të krimeve të luftës thanë të hënën se ish-presidenti i Kosovës, Hashim Thaçi, kontrollonte guerilasit etnikë shqiptarë dhe duhet të dënohet për krime lufte dhe të dënohet me 45 vjet burg”.
“Ky rast ka të bëjë me qëllimin e katër të akuzuarve për të fituar dhe ushtruar kontroll mbi të gjithë Kosovën”, tha West pranë fundit të një gjyqi gati tre-vjeçar në Gjykatën Speciale për krime lufte të Kosovës në Hagë.
Artikulli tutje potencon se Thaçi, i cili shërbeu si kryeministër, ministër i jashtëm dhe president i Kosovës së pavarur midis viteve 2008 dhe 2020, dhe të bashkëpandehurit e tij i kanë mohuar të gjitha akuzat.
Artikulli më tej potencon faktin se më shumë se 13,000 njerëz, shumica e tyre shqiptarë të Kosovës, besohet se kanë vdekur gjatë kryengritjes së fundit të viteve të 90-a, nën udhëheqjen e regjimit të Sllobodan Millosheviqit.
