Bali Muharremaj, kandidati që synon edhe një mandat në krye të Suharekës, ka zgjedhur ta rendisë të dytin në listën për Asamblenë Komunale një zyrtar të akuzuar për korrupsion. Enver Shabani, drejtori i Shërbimeve Publike dhe një nga bashkëpunëtorët më të afërt të Muharremajt, po përballet me aktakuzë për keqpërdorim të pozitës zyrtare dhe mashtrim në prokurim publik. Megjithatë, kjo nuk e ka penguar kryetarin aktual që ta përfshijë në garën për pushtet lokal.
Enver Shabani, drejtori aktual i Shërbimeve Publike në Komunën e Suharekës dhe i akuzuar për korrupsion e mashtrim, po garon për një vend në Asamblenë Komunale nga radhët e Aleancës për Ardhmërinë e Kosovës, në listën e Bali Muharremajt.
Pavarësisht se ndaj tij është ngritur aktakuzë nga Prokuroria Themelore në Prizren, Shabani figuron si numri dy në listën zgjedhore të AAK-së.
Skandal: Bali Muharremaj rendit të dytin në listë drejtorin me aktakuzë për korrupsion e mashtrim – Insajderi – image 182
Akuza për keqpërdorim dhe mashtrim në prokurim publik
Në korrik të vitit 2025, Prokuroria ngriti aktakuzë ndaj Enver Shabanit dhe zyrtarit tjetër komunal, Berat Kabashi, për veprat penale të “Keqpërdorimit të pozitës apo autoritetit zyrtar” dhe “Mashtrimit në prokurim publik”.
Sipas aktakuzës, dyshja akuzohet se kanë hartuar dhe nënshkruar raporte fiktive dhe të rreme teknike për projektin “Ndërtimi i rrugëve lokale Lot 8 – Lot 5 Nëntori i Dytë, Xhemajl Morina, Mehmet Bytyqi – segment në Reshtan”, duke deklaruar se punimet ishin përfunduar sipas kontratës. Në të vërtetë, sipas Prokurorisë, një pjesë e madhe e punimeve nuk ishte realizuar fare.
Edhe pse operatorit ekonomik i janë paguar 24,945.32 euro, vlera reale e punimeve të kryera ka qenë më e vogël. Diferenca prej 13,272.66 euro ka shkaktuar dëm material Komunës së Suharekës.
Tender i dyshimtë prej 100 mijë eurosh për organizatën e vetë Shabanit
Skandalet rreth Shabanit nuk mbarojnë këtu. Në gusht të vitit 2023, Komuna e Suharekës i ka dhënë një tender me vlerë 119,520 euro organizatës joqeveritare “Shoqata e Zjarrfikësve Vullnetar dhe Shpëtimit”, e themeluar nga vetë Enver Shabani.
Edhe pse në dokumente figura kryesore e OJQ-së është Labinot Bytyçi, Shabani është listuar si një nga tre themeluesit. Dhënia e këtij tenderi u bë vetëm një javë para arrestimit të Shabanit, çka ka ngritur dyshime të forta për konflikt interesi dhe keqpërdorim të fondeve publike.
Pas raportimeve nga media, tenderi u anulua, por ngjarja nxori në pah një tjetër përpjekje të një zyrtari publik për të përfituar në mënyrë të dyshimtë nga pozita e tij./Gazeta Insajderi
