Më 24 korrik, ish-presidenti Hashim Thaçi dha një intervistë në emisionin Rubikon në Klan Kosova. Pavarësisht shumë reagimeve që nxiti ne publik, RTK-ja në portalin e saj, nuk e publikoi asnjë lajm.
E kur pjesë të intervistës u publikuan të nesërmen më 25 korrik në edicionin qendror të lajmeve në RTK, kjo nuk kaloi në heshtje. Gazeta Nacionale ka marrë vesh se redaktori i lajmeve qendrore i asaj dite, Visar Krasniqi, është larguar nga pozita që e mbante.
Kronika me deklaratat e Thaçit u transmetua kah gjysma e edicionit, me disa prej deklaratave e reagimeve, një kronikë pak më e gjatë se dy minuta.
Por, pasojat për personin që vendosi ta citonte intervistën e ta kishte në edicion të lajmeve, u vërejtën tek më pas. Nacionale ka mësuar detajet e këtij vendimi që ka ardhur nga U.D kryeredaktori, Blerim Haxhihaj, njeriu i famshëm i intervistës me Albin Kurtin.
Sipas burimeve të Nacionales, me vendim të Haxhiajt, Visar Krasniqi u largua nga pozita e redaktorit të edicionit të lajmeve qendrore në RTK. Njoftimi dhe vendimi u mor përgjatë kohës që Krasniqi ishte në pushim vjetor, mëson Nacionale.
Pavarësisht, se në formë të shkruar, atij nuk i ishte dhënë asnjë aryse për largim, Nacionale ka mësuar se citimi i intervistës së Thaçit ishte arsyeja kryesore. Madje, këtë e kishte thënë edhe vetë U.D kryeredaktori Blerim Haxhihaj në disa takime joformale.
“Në disa takime me redaktorë e redaktorë përgjegjës, Blerim Haxhiaj ka thënë se Visar Krasniqin e kanë largu për arsyen e intervistës së Thaçit”, kanë thënë burime të Nacionales brenda RTK-së.
Pas kthimit nga pushimi, redaktori Krasniqi veç e kuptoi që nuk e ka vendin e punës të njëjtë ku e kishte lënë para se të shkonte në pushim.
Gazeta Nacionale për këtë çështje ka dërguar pyetje në adresë të Blerim Haxhiajt, Rilind Gërvallës e menaxhmentit të RTK-së, madje edhe Bordit, por që nuk ka pranuar asnjë përgjigje.
Ky vendim vjen në kohën kur RTK-ja u përfshi në një fushatë të ‘spastrimit’ të disa redaktorëve duke i larguar nga moderimi. Kjo pas presioneve e sfidimit që këta moderatorë ua bënë zyrtarëve të pushtet.
Blerta Foniqi-Kabashi, Jehona Zhitia, Arton Mulliqi, Meneta Zekaj e Valon Bajrami dhe Edona Musa-Mustafa, dolën me reagim duke alarmuar për ndërhyrje dhe presione.
Nacionale edhe në të kaluarën kishte raportuar për shumë largime e ndryshime të pozitave në RTK, duke u ngritur dilema për avancime e degradime me qëllime politike e partiake.
Në krye të televizionit në RTK është ish-anëtari i VV-së, Rilind Gërvalla.
Radio Televizioni i Kosovës kishte dhënë edhe një dëshmi së është i kapur nga partia e Albin Kurtit. Televizioni Publik, i cili financohet nga taksat e qytetarëve të Kosovës, kishte injoruar në tërësi intervistën e ish-presidentit dhe ish-kryeministrit Hashim Thaçi, që është realizuara prej Hagës nga gazetari Adriatik Kelmendi.
Ndonëse në 24 orë, kjo intervistë përbënte lajmin kryesore në vend, RTK nuk kishte dhënë asnjë lajm nga kjo intervistë.
Derisa në mediat tjera vendore shikon dhe lexon dhjetëra deklarata që ish-presidenti i Kosovës ka dhënë për tema të ndryshme në këtë intervistë, në portalin e televizionit publik “RTKLive” nuk e gjeje asnjë të tillë.
RTK-ja nuk ka raportuar as për reagimet dhe komentimet e shumta të kësaj interviste nga politikanët dhe analistët kosovarë dhe me gjerë.
Injorimi i kësaj interviste dëshmon së ky televizion është kapur fort nga njerëzit e Albin Kurtit.
Shtrëngimi i RTK-së nga Qeveria Kurti është konfirmuar edhe në intervistën e fundit që Albin Kurti ka dhënë për RTK-në.
Në këtë intervistë, ushtruesi detyrës së kryeredaktorit të RTK-së, Blerim Haxhiaj, e kishte “ledhatuar” me pyetje kryetarin e VV-së.
Kurse, para disa jave është raportuar se OJQ-ja “Cult Club”, e cila udhëhiqet nga bashkëshortja e Blerim Haxhiajt, kishte përfituar mbi 100 mijë euro nga Qeveria Kurti.
