Në kuadër të një hulumtimi për parregullsitë në sektorin privat të shëndetësisë, Veriu.info ka siguruar një vendim të Inspektoratit Shëndetësor të Ministrisë së Shëndetësisë me të cilin “Zoe Clinic Sh.P.K.” është gjobitur me dy (2) mijë euro për ushtrim të veprimtarisë pa licencë, klinikë kjo që merret me terapi fizikale për fëmijët.
Në arsyetimin e vendimit të siguruar nga Veriu.info, thuhet se në kohën e inspektimit “Zoe Clinic Sh.P.K.” nuk posedonte licencë për ushtrimin e veprimtarisë shëndetësore, me ç’rast bëhet e ditur se është konstatuar se aty ofroheshin shërbime shëndetësore nga Besa Turkishaj (Bachelor i Fizioterapisë) dhe Arbenita Islamaj (Bachelor i Fizioterapisë).
Veriu.info ka siguruar edhe raportin e inspektimit të Inspektoratit Shëndetësor, ku bëhet e ditur se për shkak të shkeljes së Ligjit për Shëndetësi, në fund të inspektimit është vendosur shenja për ndërprerjen e përkohshme të veprimtrisë së “Zoe Clinic Sh.P.K.”.
Edhe pse pa licencë, Inspektorati Shëndetësor ka gjetur se “Zoe Clinic Sh.P.K.” ka ofruar shërbime shëndetësore ilegalisht nga data 21 janar 2025, gjë që është konstatuar nga të dhënat e evidentuara në fletore me emrat e pacientëve.
Siç shihet në dëshmitë e siguruara nga kjo fletore, pagesat nga pacientët janë bërë me para të gatshme.
Ndryshe, Arbenita Islamaj dhe Besa Turkishaj janë pronare të në “Zoe Clinic Sh.P.K.” me nga 50% të aksioneve.
Veriu.info ka dërguar pyetje më 6 janar në “Zoe Clinic Sh.P.K.” në lidhje me të gjeturat e Inspektoratit Shëndetësor, por deri në publikimin e këtij artikulli nuk kemi marrë përgjigje.
Pamje ekskluzive nga momenti i mbylljes së përkohshme të “Zoe Clinic Sh.P.K.”:
