Gjatë shkëmbimit të mesazheve mes personit i cili dyshohet se falsifikoi diplomat dhe klientëve të tij, Hamdi Nrecaj përmendi drejtorin e shkollës së mesme “Arkitekt Sinani” në Mitrovicë.
Nrecaj hodhi akuza se po mundohet që punën e pranimit të diplomave ta rregullojë drejtpërdrejt me drejtorin e shkollës, Sami Rama, raporton Kiks Kosova.
Këto pretendime i hodhi poshtë Rama, duke thënë se çështja e këtyre diplomave tashmë është duke u hetuar nga Inspektorati i Arsimit dhe sipas raportit të fundit që kanë nga ky institucion, këto diploma kanë rezultuar të falsifikuara.
Rama theksoi se nuk e ka idenë se kush po e kryen këtë punë, për çka thotë se ndihet shumë i shqetësuar, sepse po dëmtohet imazhi i institucionit të cilin ai e drejton.
Kiks Kosova kontaktoi edhe Drejtoreshën e Arsimit, Drita Kadriu, por me arsyetimin se është tejet e zënë, nuk pranoi të japë qëndrimin e saj.
Pyetje u dërguan edhe në adresën e Ministrisë së Arsimit, mirëpo në momentin kur po transmetohet kjo kronikë, redaksia nuk ka marrë asnjë përgjigje nga ky institucion.
