Përfaqësuesi special i BE-së për dialogun Kosovë-Serbi, Peter Sorensen, ka pritur sot në takim Besnik Bislimin dhe Petar Petkoviç, si kryenegociatorë të bisedimeve.
Pas takimit, Sorensen deklaroi se bashkë me Bislimin dhe Petkoviçin folën mbi avancimin e normalizimit të marrëdhënieve mes dy shteteve, dhe përgatitjet për takimin e nivelit të lartë, shkruan IndeksOnline.
“Organizova një takim të gjatë të kryenegociatorëve të Kosovës dhe Serbisë në Bruksel. Folëm rreth avancimit të normalizimit të marrëdhënieve të tyre në përgatitje të një takimi të Dialogut të nivelit të lartë, detyrimeve të zbatimit në pritje dhe çështjeve aktuale. Ramë dakord që diskutimi të vazhdojë së shpejti” deklaroi Sorensen.
Nga ana tjetër, Bislimi deklaroi se ndërmjetësi i ri i Bashkimit Evropian për dialogun Kosovë-Serbi, Peter Sorensen, ka një vizion të qartë për mënyrën se si duhet të ecet përpara në proces. Megjithatë, ai ka theksuar se është ende herët të priten rezultate konkrete.
“Kemi pasur seri takimesh. Kemi filluar me një takim trilateral, i cili ishte i pari i këtij formati me Sorensenin. Ideja ka qenë që të kemi tri tema të ndryshme në takimet e sotme. Në fillim, jemi dakorduar për principet se si do të udhëhiqen takime trilaterale me Sorensenin. Jemi dakorduar me të gjitha propozimet e Sorensenit”, u shpreh Bislimi.
