Deputetët e Kuvendit të Kosovës do të mblidhen sërish sot, në përpjekjen e radhës për të konstituuar Kuvendin, e që tash po përballet me bllokadën e re.
Konstituimi i Kuvendit ka mbetur peng i zgjedhjes së nënkryetarit nga radhët e komunitetit serb, pasi paraprakisht u zgjodhën kryetari, nënkryetarët nga partitë shqiptare, si dhe ai i komuniteteve pakicë joserbe.
Tashmë ka nisur procesi i hedhjes së shortit për të zgjedhur nënkryetarin nga ky komunitet.
Në seancën e kaluar, deputeti Nenad Rashiq nuk arriti të marrë votat e nevojshme për t’u zgjedhur nënkryetar i Kuvendit nga radhët e komunitetit serb. Për votuan 55 deputetë, 1 ishte kundër dhe 20 abstenuan.
Seanca e sotme nis në orën 11:00. Konstituimi nuk konsiderohet i mbyllur pa u zgjedhur të gjithë nënkryetarët.
Pas konstituimit kalohet në rrugën për formimin e Qeverisë.
