Në Klinikën e Kirurgjisë Vaskulare të QKUK-së është realizuar për herë të parë stentimi i arterieve karotide.
Drejtori i Klinikës së Kirurgjisë Vaskulare, Hajriz Rudari, e ka cilësuar këtë si një ditë historike për vendin, duke theksuar se po fillon një epokë e re e trajtimeve të cilat deri më tani nuk ishin të mundshme në QKUK.
Pacienti i parë që iu nënshtrua këtij intervenimi është një 72-vjeçar me sëmundje kronike, për të cilin kjo metodë ishte e domosdoshme.
“Intervenimi ka zgjatur rreth 2 orë e gjysmë sepse patologjia ka qenë më e komplikuar se që kemi pritur, por ka shkuar me sukses,” tha Rudari.
Ai shtoi se kjo metodë është më e sigurt dhe më e favorshme për pacientin, pasi është një procedurë e mbyllur që mundëson rikuperim më të shpejtë.
“Nëse nuk do të ndërhynim, pacienti mund të kishte sulm, të paralizohej ose edhe të vdiste,” potencoi ai.
Deri më tani, realizimi i ndërhyrjeve të tilla ka qenë i pamundur për shkak të mungesës së pajisjeve. .
Ky sukses u bë i mundur falë bashkëpunimit të Klinikës së Kirurgjisë Vaskulare me doktor Dimitrios Nikas nga Universiteti i Janinës në Greqi, i cili ka dhënë kontribut të rëndësishëm në realizimin e intervenimit.
