Ministri i Punëve të Brendshme në detyrë, Xhelal Sveçla, ka reaguar ndaj deklaratave të zyrtarëve serbë lidhur me një rast pronësor në veri të Kosovës, duke i cilësuar ato si pjesë e një fushate të rrezikshme dezinformimi të udhëhequr nga presidenti serb Aleksandër Vuçiq.
Sveçla ka shpërndarë reagimin zyrtar të Agjencisë Kosovare për Krahasim dhe Verifikim të Pronës (AKKVP), e cila sqaroi se prona e përmendur nga zyrtarët serbë, që i përket familjes Shipolli, është njohur ligjërisht që në vitin 2005 dhe se çdo veprim i agjencisë është në përputhje me vendimet përfundimtare të institucioneve të drejtësisë.
Në postimin e tij, ministri Sveçla ka thënë se Serbia po përpiqet të manipulojë opinionin përmes gënjeshtrave të fabrikuara dhe ka bërë një krahasim të fortë me një nga figurat ideologjike më të njohura të nacionalizmit serb:
“Ashtu siç ka deklaruar njëri nga ideologët dhe frymëzuesit kryesorë të krimeve serbe në fund të shekullit të kaluar, Dobrica Çosiq – se gënjeshtra është interes nacional serb – Vuçiq dhe shpura e tij po mundohen me përpikëri t’i qëndrojnë kësaj”, ka shkruar ai në Facebook.
Më tej, ai thekson se në Republikën e Kosovës nuk do të mbizotërojë dezinformimi, por ligjshmëria.
“Por kot e kanë. Në Republikën tonë, jo vetëm e vërteta, por edhe rendi e sundimi i ligjit do të mbizotërojnë kurdo dhe kudo”, ka shkruar tutje ai.
