Kryetari i Odës Ekonomike Amerikane në Kosovë, Arian Zeka, tha se është e pakupimtë që po vazhdon të mbetet në fuqi tarifa prej 10% ndaj produkteve me origjinë nga ShBA – dhe kjo referuar kërkesës së Presidentes së Kosovës, Vjosa Osmani, për heqjen e saj dhe refuzimit të Qeverisë së Kosovës për ta ndërmarrë këtë hap.
Duke folur për “Ekonomia Online” Zekaj tha se një çështje e tillë që përfshinë marrëdhëniet, në këtë rast tregtare, me ShBA-në, do të duhej të ishte padiskutueshëm objekt konsensusi i brendshëm.
“Nuk ka pasur ndonjë reagim pozitiv nga ana e qeverisë së Kosovës. I vetmi reagim ka qenë ai i anëtarëve të dikastereve qeveritare që i kanë bërë kërkesës së parashtruar nga ana e presidentes së Kosovës për të njëjtën çështje. Pra, që të pezullohen tarifat doganore me Shtetet e Bashkuara të Amerikës. Ishte e pakuptimtë që në vend që të kishim një reagim pozitiv, çështja përfundoi me një polemikë të brendshme politike, për çka ne sërish si Odë Ekonomike Amerikane reaguam pas kërkesës sonë fillestare që të hiqen tarifat doganore me SHBA-në.
Është një çështje që të mos ndërmarrësh veprim, por është çështje tjetër që pastaj kërkesat e tilla të shndërrohen në objekt polemikash të brendshme politike. Asnjë çështje, e cila ndikon tek ju në marrëdhëniet me SHBA-në nuk do të duhej të bëhej objekt i polemikave, por do të duhej të ishte gjithmonë çështje e konsensusit të padiskutueshëm të brendshëm politik. Ajo çfarë kemi parë prej shumicës së partive në Kosovë është që e kanë mbështetur një kërkesë të tillë dhe rrjedhimisht vetëm partia në pushtet nuk ka ndërmarrë masa të tilla ose nuk është deklaruar nëse e mbështet një kërkesë të tillë”, tha Zeka për Ekonomia Online.
