Senatori demokrat amerikan Cory Booker theu rekordin në Senatin e vendit të martën duke mbajtur një fjalim që zgjati më shumë se 25 orë kundër politikave të Presidentit Donald Trump .
Demokrati 55-vjeçar nga Nju Xhersi doli në Senat të hënën mbrëma dhe përfundoi pas 25 orësh e pesë minutash. Ai tashmë kishte thyer rekordin e mëparshëm pas 24 orësh e 19 minutash, gjë që mori duartrokitje nga salla.
Sipas rregullave të Kongresit, një senator mund të flasë sa të dojë, me kusht që të mos humbasë fjalën dhe të mos ketë kufizime të veçanta në debat. Senatorët duhet të qëndrojnë në këmbë dhe mund të bëjnë vetëm pushime minimale gjatë fjalëve të tyre.
Fjalimi më i gjatë i dokumentuar në historinë e Senatit Amerikan deri në atë pikë u mbajt nga Senatori Strom Thurmond në vitin 1957, i cili zgjati 24 orë e 18 minuta ndërsa ai u përpoq të bllokonte kalimin e Aktit të të Drejtave Civile
Booker, ndër të tjera, kritikoi fushatën e presidentit republikan dhe këshilltarit të tij kryesor Elon Musk , personi më i pasur në botë, për të reduktuar pjesë të mëdha të qeverisë federale.
“Institucionet tona janë sulmuar në mënyrë të pamatur dhe jokushtetuese, madje janë shpërbërë”, tha Booker, i zgjedhur për herë të parë në Senat në vitin 2013./Indeksonline/
