Tottenhami dhe Liverpooli do ta zhvillojnë sonte përballjen e parë gjysmëfinale të Carabao Cup.
Skuadrat do t’i matin forcat në ndeshjen që do të luhet në Londër duke filluar nga ora 21:00.
Kjo fazë do të luhet me sistem vajtje-ardhje, prandaj edhe dy ekipet do të mundohen të krijojnë kapital sonte para ndeshjes së kthimit, e cila do të luhet në “Anfield Road”.
“Reds” janë në kulmin e formës, por trajneri Arne Slot mund t’ua japë rastin edhe disa lojtarëve që s’po kanë mundësi të luajnë në Premierligë, prandaj edhe ky fakt do ta nivelizonte paksa lojën.
Nga ana tjetër, londinezët nuk e kanë nisur si duhet sezonin duke përfunduar në vendin e 12-të për momentin, me 10 humbje nga 20 ndeshje të zhvilluara.
Sidoqoftë, ndeshjeve të kupës nuk iu dihet kurrë, prandaj edhe fituesi i sontëm mund të përcaktohet në çdo moment, deri në fund të takimit.
Në ndeshjen tjetër gjysmëfinale, e cila u zhvillua mbrëmë, Arsenali u mposht në shtëpi nga Newcastle United me rezultat 0:2, ndërsa dueli i kthimit do të jetë përcaktues për finalistin, me Bardhezinjtë që janë favoritë pas kapitalit të krijuar në lojën e parë në “Emirates Stadium”. /Gazeta Express
