Ndërmarrja Publike Komunale e Prishtinës “Trafiku Urban” që drejtohet nga U.D. Kryeshefi Ekzekutiv, Qendrim Vitija, kishte shpallur tender për furnizim mr vajra dhe fluid për ftohje, kontratë e cila parashihej të peshonte 235,500.00 euro, raporton Veriu.info.
Për të fituar këtë tender të kësaj ndërmarrje publike kishin ofertuar pesë (5) kompani, ku të gjitha ishin me çmim më të ulët se sa vlera e parashikuar.
Mirëpo, njëri prej ofertuesve kishte konkuruar me çmim gati përgjysmë më të lirë se sa vlera e parashikuar. “OIL KS” ShPK ka ofertuar në këtë tender me çmim prej 142,700.00 euro, por që është eliminuar nga “Trafiku Urban”.
Në dokumentet e siguruara nga Veriu.info, shihet se me kontratën “Furnizim me Vajra dhe fluid për ftohje” është shpërblyer operatori ekonomik “Kadiu” Sh.P.K., i cili kishte ofertuar me çmim prej 215,150.00 euro.
Pra, ndërmarrja publike komunale “Trafiku Urban” nuk e ka shpërblyer ofertuesin më të lirë, por me këtë kontratë zyrtari i prokurimit Durim Gerbeshi, e ka shpërblyer kompaninë që ka ofertuar me çmim prej 72,450 me të lartë se sa ofertuesi më i lirë./Veriu.info
