Një rast i rëndë vjedhjeje është zbuluar në fshatin Prelez të Zubin Potokut, ku Policia ka hasur gjatë patrullimit kabllo të këputura të rrjetit elektrik dhe pajisje metalike për ngjitje në shtylla.
Sipas informacioneve të Sinjalit, ngjarja ka ndodhur më 16 gusht 2025 rreth orës 22:15, kur njësitë policore kanë hasur në vendngjarje një person të dyshuar, i cili u arrestua menjëherë. Ai është identifikuar si Stefan Spasojeviq rreth 29-vjeçar.
Hetimet kanë çuar edhe në dy persona të tjerë të dyshuar, Nemanja Radojkoviq rreth 29-vjeçar dhe Miljan Radojkoviq rreth 35-vjeçar, të cilët fillimisht nuk janë gjetur në shtëpitë e tyre, por familjarët janë njoftuar që të paraqiten në stacionin policor.
Në vendngjarje kanë dalë njësitë e hetimeve dhe krim-teknika, të cilat kanë tërhequr kabllot e këputura si dëshmi. Vlerësimi i saktë i dëmit do të bëhet nga kompania energjetike ElektroSeveri.
Me vendim të prokurorit, ndaj Spasojeviq është caktuar masa e ndalimit policor prej 48 orësh dhe ai është dërguar në Qendrën e Mbajtjes.
Ndërkohë, më 17 gusht 2025 rreth orës 17:15, dy të dyshuarit e tjerë janë paraqitur vetë në Stacionin Policor të Zubin Potokut, ku janë intervistuar në prezencë të avokatit mbrojtës. Ata kanë mohuar përfshirjen në vjedhje, duke deklaruar se ishin larguar me vrap vetëm pasi panë dritat e policisë. Me urdhër të prokurorit, të njëjtit janë liruar, ndërsa rasti mbetet nën hetime.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.
