Presidenti i SHBA-së, Donald Trump i ka thënë kryeministrit norvegjez Jonas Gahr Stoere se ai nuk ndihet më i detyruar “të mendonte vetëm për Paqen” pasi Komiteti Norvegjez i Nobelit nuk ia dha atij Çmimin Nobel për Paqe, ndërsa përsëriti kërkesën për kontroll mbi Grenlandën në një letër që është parë nga Reuters, shkruan CNN.
“I dashur Jonas: Duke marrë parasysh që vendi juaj vendosi të mos ma jepte Çmimin Nobel për Paqe për ndalimin e 8 luftërave PLUS, unë nuk ndihem më i detyruar të mendoj vetëm për Paqen, megjithëse ajo do të jetë gjithmonë mbizotëruese, por tani mund të mendoj për atë që është e mirë dhe e drejtë për Shtetet e Bashkuara të Amerikës”, shkroi Trump në letër, sipas Reuters.
“Danimarka nuk mund ta mbrojë atë tokë nga Rusia ose Kina, dhe përse kanë ata një ‘të drejtë pronësie’ gjithsesi? Nuk ka dokumente të shkruara, është vetëm fakti që një varkë zbriti atje qindra vjet më parë, por edhe ne kemi pasur varka që kanë zbritur atje”, shkroi ai.
“Unë kam bërë më shumë për NATO-n sesa çdo person tjetër që nga themelimi i saj, dhe tani, NATO duhet të bëjë diçka për Shtetet e Bashkuara. Bota nuk është e sigurt nëse nuk kemi Kontroll të Plotë dhe Total mbi Grenlandën”, shkroi ai.
