Presidenti amerikan, Donald Trump, në disa paraqitje të tij publike ka përmendur Kosovën dhe Serbinë dhe ka treguar se si ka ndalur një sulm drejt Kosovës duke kërcënuar Serbinë me ndalje të tregtisë me SHBA-në. Se një kërcënim i tillë ka ekzistuar dhe se rreziku vazhdon ende, e ka thënë të enjten edhe presidentja e Kosovës, Vjosa Osmani, gjatë një diskutimi në Johns Hopkins University në Washington. Shefja e shtetit është shprehur e bindur bazuar në informacionet e saj duke thënë se “e di për çfarë po flasë”.
Besnik Velija
Por çfarë thonë nga Aleanca Veri-Atlantike e cila është e pranishme në Kosovë me trupat e saj, lidhur me deklarimet e presidentit Trump dhe konfirmimin e presidentes Vjosa Osmani për kërcënimin e “javëve të fundit”.
Në një përgjigje ekskluzive për Gazetën Express, një zyrtar i NATO-s, ka thënë se rajoni i Ballkanit Perëndimor mbetet i një rëndësie jetike për Alenacën dhe angazhimi i NATO-s për stabilitet në rajon mbetet i palëkundur.
“Ballkani Perëndimor mbetet një rajon me rëndësi strategjike për Aleancën. Angazhimi ynë për stabilitetin rajonal është i palëkundur, siç e përsëriti Sekretari i Përgjithshëm i NATO-s për mediat, në margjinat e Samitit të NATO-s në Hagë”, ka thënë ky zëdhënës i NATO-s për Gazetën Express.
Ndërsa për pyetjet specifike të Express lidhur me informacionet e NATO-s për një sulm të mundshëm dhe nëse ai ka pasur të ndodhë përmes ndërhyrjes ushtarake apo nëse do të ishte një përsëritje e Banjskës, ky zyrtar i NATO-s ka thënë se për këto detaje të drejtohemi tek institucionet amerikane dhe ato të Kosovës.
“Për çështjen specifike që keni ngritur, ju drejtoj institucioneve në Kosovë dhe autoriteteve amerikane për çdo koment të mëtejshëm”, ka përfunduar ky zëdhënës për Gazetën Express.
Informacione për një sulm të mundshëm të Serbisë s’ka pasur kryeministri Albin Kurti, kur ditë më parë në një intervistë, është pyetur rreth deklarimeve të presidentit Trump. Derisa sot kreu i MPB-së, Xhelal Sveçla, i pyetur rreth kësaj çështje ka thënë se përgjigje duhet kërkuar te presidentja Osmani. /GazetaExpress/
