Presidenti i Shteteve të Bashkuara, Donald Trump, ka thënë se do t’u vendosë taksë prej 35 për qind mallrave kanadeze duke filluar nga 1 gushti, edhe pse dy shtetet ishin vetëm disa ditë larg një afati të vendosur për arritjen e një marrëveshjeje të re tregtare.
Njoftimi erdhi në formën e një letre të publikuar në rrjetin “Truth Social” të Trumpit, bashkë me kërcënime të tjera shtesë për taksa prej 15 ose 20 për qind ndaj shumicës së partnerëve tregtarë, raporton televizioni BBC.
Kryeministri kanadez, Mark Carney, tha se qeveria e tij do të vazhdojë që t’i mbrojë punëtorët dhe bizneset kanadeze, përderisa ata të punojnë drejt një afati të ri.
Trumpi u ka dërguar vendeve të tjera më shumë se 20 letra të tilla këtë javë. Ai thotë se do të njoftojë së shpejti taksa të reja edhe ndaj Bashkimit Evropian.
Si në letrën për Kanadanë, presidenti amerikan është zotuar se taksat e reja edhe ndaj vendeve të tjera do të fillojnë nga 1 gushti.
Një taksë prej 25 për qind tashmë është vendosur ndaj disa mallrave kanadeze. Shteti i dytë më i madh në botë me sipërfaqe gjithashtu është goditur rëndë nga taksat e Trumpit ndaj çelikut, aluminit dhe veturave, edhe pse tani për tani është në fuqi një përjashtim për mallrat që përfshihen në një marrëveshje amerikanoveriore për tregti të lirë.
Nuk është e qartë nëse taksat e reja do të vlejnë edhe për mallrat që mbulohen nga Marrëveshja Kanada – ShBA – Meksikë (CUSMA).
