Donald Trump ka thënë se një takim mes tij dhe Vladimir Putinit është duke u caktuar për t’i dhënë fund “rrëmujës së përgjakshme” të luftës në Ukrainë.
“Ai po dëshiron të takohemi, dhe po e caktojmë atë”, tha të enjten presidenti i zgjedhur jashtë rezortit të tij Mar-a-Lago në Florida, raporton “The Telegraph”.
“[Putini] madje e tha këtë publikisht, dhe na duhet ta përfundojmë atë luftë, është një rrëmujë e përgjakshme”, shtoi ai, duke thënë se do të presë deri pas inaugurimit të tij më 20 janar për të takuar liderin rus.
Të premten, Dmitry Peskov, zëdhënësi i Kremlinit, sqaroi se nuk ka pasur asnjë kërkesë zyrtare për një takim me kampin e Trumpit, por shtoi se Putini “do të mirëpriste” një qasje të tillë dhe ishte “i gatshëm” për dialog me Uashingtonin.
Kthimi i Trumpit në Shtëpinë e Bardhë ka nxitur frikë në Kiev se ai synon të ndërpresë ndihmën ushtarake ndaj Ukrainës dhe të arrijë një marrëveshje të shpejtë të paqes që do të ishte në disavantazh të madhe për vendin e shkatërruar nga lufta.
