Një gjykatë turke ka urdhëruar të mërkurën ndalimin e qasjes në chatbot-in e inteligjencës artificiale Grok të Elon Musk nga territori i Turqisë, pasi dyshohet se platforma ka shpërndarë përmbajtje fyese ndaj presidentit të Turqisë dhe disa figurave të tjera.
AP raporton se chatboti, i zhvilluar nga kompania e Musk, xAI, ka postuar shprehje vulgare ndaj presidentit turk Recep Tayyip Erdogan, nënës së tij të ndjerë dhe figurave të tjera publike, ndërsa i përgjigjej pyetjeve të përdoruesve në rrjetin social X. Ndërsa, media të tjera turke poashtu kanë raportuar se Grok kishte përdorur komente fyese edhe ndaj themeluesit të Turqisë moderne, Mustafa Kemal Ataturk dhe profetit Muhammed.
Bëhet e ditur se këto komente kanë shkaktuar reagim të menjëhershëm në opinionin publik në Ankara, i cili ka kërkuar vendosjen e kufizimeve sipas ligjit turk të internetit, duke përmendur një kërcënim ndaj rendit publik.
Incidenti është pjesë e një vazhde raportimesh që janë bërë në lidhje me Grok, që dyshohet se ka sjellë përgjigje “politikisht të pasakta” dhe ofendime të ndryshme ndaj figurave.
Ndërkohë, në përgjigje të polemikave në rritje, platforma X ka thënë se ishte në dijeni të postimeve të fundit dhe kishte marrë masa të menjëhershme për të hequr përmbajtjen e papërshtatshme.
“Që kur u informuam për përmbajtjen, xAI ka marrë masa për të ndaluar gjuhën e urrejtjes përpara se Grok të postojë në X,” ka thënë kompania në një deklaratë.
