Udhëheqësi i Lëvizjes së Deçanit në Mitrovicë, Ahmet Musa, që pas konvertimit në katolik mban emrin Shqiptar Shaljani, ka sulmuar kandidatin për kryetar të Mitrovicës nga PDK, Arian Tahirin.
Ai ka thënë se pas Tahirit qëndrojnë edhe projektet për ndarje territoriale, raporton Gazeta Online Veriuinfo.
Në anën tjetër ai ka bërë thirrje që të votohet kandidati Faton Peci, për të cilin ka thénë se është e ardhmja.
Shaljani i konvertuar në katolik ka kohë që angazhohet për ndërtimin e një kishe në fshatin e tij të lindjes, në Bajgorë.
Postimi i plotë i tij:
Balotazh në Mitrovicë — Votë për dinjitetin dhe sovranitetin .
Të nderuar bashkëqytetarë,
Të dashur shaljanë e mitrovicas kudo ku jeni :
Më 9 nëntor, ne do të zgjedhim Kryetarin e Mitrovicës. Secili prej nesh mban përgjegjësinë morale dhe qytetare për vendimin që merr, sepse vota nuk është vetëm preferencë — është amanet për të ardhmen e qytetit tonë dhe të Republikës së Kosovës.
Sot Mitrovica nuk është thjesht në garë zgjedhore; ajo është në një provë të madhe politike dhe kombëtare. Po zhvillohet një lojë e rrezikshme në prapaskenë, një skenar që rrezikon sovranitetin e shtetit dhe hap rrugë ndarjes së Mitrovicës. Këtë duhet ta themi hapur, pa frikë, sepse heshtja është bashkëfajsi.
Dy kandidatë — dy rrugë për të ardhmen
Arjan Tahiri, një djalë i ri dhe i kulturuar, me siguri do të dëshironte t’i shërbente Mitrovicës. Por realiteti është i qartë: ai nuk e ka kandiduar vetveten. Pas tij qëndrojnë interesa të fuqishme biznesore e politike, media të blera e struktura që kanë një objektiv të vetëm — kontrollin e Mitrovicës dhe dobësimin e institucioneve, deri tek projektet për ndarje territoriale.
Emri është i Arjanit, por pushteti do të jetë i tyre. Dhe Mitrovica nuk meriton të kthehet në monedhë pazari.
Faton Peci, bir Shale dhe pasardhës i një familje atdhetare, bart amanetin e Isë Boletinit — amanetin e tokës, dinjitetit, punës dhe mbrojtjes së qytetit. Ai nuk vjen në këtë garë për të ndjekur interesa të fshehta, por për të shërbyer popullit, për ta forcuar Mitrovicën dhe për të kthyer dinjitetin e Shalës dhe të gjithë komunës.
Po, edhe Arjani është shaljan — por sot pyetja nuk është kush jemi, por kujt t’i shërbejmë: qytetarëve apo grupeve të interesit? Dallimi këtu është thelbësor.
Kosova është shtet laik — vota nuk blihet me predikime.
Në këtë fushatë u përmendën shpesh kisha e xhamia, sikur po zgjidhnim mes një kryeimami dhe një ipeshkvi, e jo mes dy administratorëve lokalë.
Le ta themi qartë:
Republika e Kosovës është shtet demokratik dhe laik. Kryetari i Mitrovicës nuk është as hoxhë dhe as prift. Pushteti merret me votë qytetare, jo me predikim dhe jo me frigësime fetare.
Feja e parë e shqiptarëve është Shqiptaria. Kush dëshiron të shkojë në xhenet — rrugë të mbarë, por pushtetin nuk do ta marrë duke abuzuar me fenë dhe duke cënuar shtetin!
Thirrja ime
Më 9 nëntor votoni me vetëdije.
Votoni për sovranitetin e Mitrovicës.
Votoni për dinjitetin e Shalës.
Votoni për një të ardhëme të drejtë, të pastër e me dinjitet.
Mitrovica nuk guxon më të bjerë në duart e interesa të errëta, sepse Mitrovica është zemra e Kosovës dhe zemra nuk jepet asnjëherë me qira.
Vota është e shejt , kush shet votën shet çdo gjë , shet edhe Atdheun sikur t’ishte pronë private !
Linku i postimit: https://www.facebook.com/share/p/17ccvD84g2/
