Publicisti Uk Lushi ka reaguar në rrjetin social Facebook pas ndeshjes mes Shqipërisë dhe Serbisë, e zhvilluar në Tiranë. Në postimin e tij, ai ka komentuar sjelljen e tifozëve dhe ka shprehur qëndrimin e tij lidhur me flamurin e UÇK-së që u largua nga forcat e rendit gjatë ndeshjes.
Lushi ka vlerësuar mbarëvajtjen e përgjithshme të ndeshjes, duke thënë se “përpos disa domateve të kalbura që hodhën shishe, gjithçka ishte me dinjitet.” Ai ka theksuar se shqiptarët nuk duhet të ndjekin shembullin e tifozëve serbë që, sipas tij, shfaqin sjellje shoviniste.
Në reagimin e tij, Lushi ka përkrahur veprimin e policisë shqiptare për largimin e flamurit të UÇK-së nga stadiumi, duke thënë se ai simbol nuk i përket ngjarjeve sportive.
“Flamuri me UÇK është për fusha betejash baroti dhe nuk është nderim të valavitet në fusha futbolli,” ka shkruar ai.
Ai ka shtuar gjithashtu se, sipas tij, pa ndihmën e Republikës së Shqipërisë nuk do të kishte pasur UÇK. Për disa reagime nga Prishtina kundër veprimit të policisë, ai ka thënë se janë të pajustifikuara.
