Ish-eprori i UÇK-së nga Batalioni “Atlantiku”, Uk Lushi, ka kritikuar ashpër kryeministrin në detyrë, Albin Kurti, duke e quajtur atë një politikan për pesë vite në pushtet nuk ka treguar se është burrështetas. Ai thotë se VV ka shqiptarë më të mençur se Kurti e s’duhet të frikësohen nga tigri prej letre.
Në një reagim në Facebook, Lushi tha se edhe pas ftesës për LDK-në për bashkëqeverisje, Kurti duhet të shkojë më tej duke ftuar edhe PDK-në për bisedime.
“Kurti për 5 vite në kalin e pushtetit nuk ka dëshmuar asnjëherë që di apo do të jetë burrështetas, por e ka rastin përsëri. Pas ftesës për LDK-në për të diskutuar për bashkëqeverisje, Kurti mund fton PDK-në për diskutime serioze ku shteti i Kosovës do të vihet mbi PDK-në dhe VV-në. Gjasat janë të vogla që politikani i vogël Kurti mund të bëjë një gjest të tillë të madh, edhe pse kjo sjellje është normale në çdo sistem shumëpartiak dhe demokratik”, tha Lushi.
Ai e cilësoi Kurtin si “bllokuesin” kryesor dhe theksoi se “Kurti e do Kurtin më shumë se shtetin”.
Lushi u bëri thirrje anëtarëve të VV-së që kanë atdhedashurinë mbi liderin e tyre, që të mos pranojnë “diktatin skllavërues” dhe të kërkojnë ndryshim.
“Pjesëtarët e VV-së që kanë atdhedashurinë mbi Kurtin dhe partinë VV duhet t’i thonë Kurtit që nuk do të pranojnë diktat skllavërues ndaj liderit. Nëse Kurti do djegje, VV duhet të krijojë fraksion dhe Kurti duhet të rrëzohet nga froni mbretëror partiak. VV ka shqiptarë më trima, më të mençur dhe më të dijshëm se Kurti. VV nuk kanë pse frikohen nga tigri prej letre. Mëkatari Kurti le të lahet nga janeti Kurti!”, theksoi ai.
