Ukraina po synon të organizojë një takim mes Presidentit Volodymyr Zelensky dhe Presidentit të SHBA-së, Donald Trump, në një datë të afërt gjatë këtij muaji, ndërsa përpjekjet ndërkombëtare për arritjen e një marrëveshjeje paqeje vazhdojnë.
Kreu i Këshillit të Sigurisë Kombëtare të Ukrainës, Rustem Umerov, deklaroi të martën se delegacionet amerikane dhe ukrainase kanë arritur një “kuptim të përbashkët mbi termat kyç” të planit të diskutuar më herët në Gjenevë. Shtëpia e Bardhë deri më tani nuk ka komentuar mbi mundësinë e një takimi Trump–Zelensky.
Ndërkohë, SHBA ka konfirmuar se zyrtarët e saj do të takohen me përfaqësues rusë në Abu Dhabi për të vazhduar bisedimet.
Situata në terren mbetet e tensionuar. Sulmet ajrore të natës sollën viktima në të dyja anët e frontit: së paku gjashtë persona humbën jetën në Kiev nga sulmet ruse, ndërsa autoritetet ruse raportuan tre të vrarë në rajonin Rostov pas një goditjeje ukrainase.
Umerov tha se ekipi i tij po punon për të finalizuar vizitën e Zelensky-t në SHBA “në datën më të afërt të përshtatshme në nëntor, për të përmbyllur hapat e fundit dhe për të arritur një marrëveshje” me Presidentin Trump.
Sipas një zyrtari amerikan të cituar nga BBC, Ukraina ka rënë dakord “në parim” për një marrëveshje paqeje, megjithëse mbeten ende disa detaje për t’u sqaruar. Megjithatë, hendeku midis kushteve të pranueshme për Kievin dhe Moskën mbetet i madh, dhe Kremlini duket i painteresuar në një marrëveshje që plotëson kërkesat ukrainase.
Drafti fillestar i planit amerikan u kritikua nga Kievi dhe disa kryeqytete evropiane si tepër i favorshëm për Rusinë. Propozimet e reja të përgatitura nga Britania, Franca dhe Gjermania përjashtojnë njohjen e territoreve të pushtuara, rrisin madhësinë e ushtrisë së lejuar të Ukrainës dhe lënë të hapur mundësinë e anëtarësimit të saj në NATO.
Zelensky i mirëpriti ndryshimet, duke theksuar se tani “lista e hapave të nevojshëm për t’i dhënë fund luftës mund të bëhet e realizueshme”.
